REKORDPRYS VIR MAKADAMIAS AANGEBIED
’N PRYS van $21 (sowat R303) per kilogram makadamianeute is die hoogste dollarprys wat ’n maatskappy boere nóg vir dié neute aangebied het.
Green Farms Nut Company (GFNC) van Witrivier in Mpumalanga het die prysaanbod aan boere vir die 2019-produksiejaar aangekondig. Die prys, vir uitgedopte neute van die hoogste gehalte, is sowat 20% hoër as in 2018.
Die swakker rand en sterker internasionale prys vir makadamianeute het ’n rol gespeel in die aanbod, sê mnr. Alex Whyte, hoof van Green Farms se bemarkingsafdeling.
Hy wys daarop dat neute van verskillende groottes en gehalte verskillende pryse behaal. Styl 1neute sal vir ’n boer $20/kg verdien, styl 2 $18,20/kg en styl 4 $17,30/kg. Vir styl 5, 6 en 7 sal boere $16,60/kg verdien.
Mnr. Allen Duncan, uitvoerende hoof van GFNC, sê die sterk vraag na uitgedopte neute vir die bestanddelemark ondersteun ’n baie sterk dollarprys vir makadamianeute.
CHINA
Volgens Whyte is die prys vir onuitgedopte neute op die Chinese mark in hierdie stadium nie besonder goed nie. China het glo reeds aangekondig dat hy net die invoer van neute met ’n kern van groter as 22 mm sal toelaat. Dit is om die groeiende plaaslike makadamiabedryf
daar te beskerm, wat in hierdie stadium kleiner neute van ’n swakker gehalte lewer.
“Ons sal die Chinese mark dophou. Die prysaanbod sal waarskynlik later in die jaar verstewig, maar in hierdie stadium is dit nie vir ons lonend om neute soontoe te stuur nie, met die uitsondering van kultivars soos Beaumont, waarvan die kern geneig is om te verdeel wanneer die neut gekraak word.”
Duncan sê dat Chinese kopers al hoe meer geneig is om Australiese neute te koop omdat geen invoertarief daarop betaalbaar is nie.
“Totdat daar ’n beter aanbod uit China kom, gaan ons ons op ander markte toespits,” sê Whyte.