NWKV wil Chinese na SA nooi oor verbod op wol
DIE wolbedryf se kode van beste praktyk moet die minimum standaard wees waaraan Suid-Afrikaanse wolboere en hul skeersel moet voldoen. Terselfdertyd moet wolboere voortgaan om by bedryfsnorme aan te pas ten einde wol as ’n nismarkproduk aan die wêreld te lewer.
Dit was die boodskap van mnr. Guillau du Toit, voorsitter van die Nasionale Wolkwekersvereniging (NWKV), op die organisasie se Vrystaatse kongres.
“Die boer moet sy verbruiker se behoeftes en voorskrifte in ag neem,” het hy gesê. “Die benutting van moderne tegnologie is nie onderhandelbaar nie, maar die wolboer moet steeds die basiese praktyke reg toepas.”
Volgens Du Toit kon die probleme weens die onlangse voorkoms van bek-en-klouseer in Limpopo voorkom gewees het as die naspeurbaarheidsbeginsels toegepas is, soos met die uitbreking van slenkdalkoors in 2011.
Een van die NWKV se pogings om die wolhandel met China te herstel, is om ’n Chinese afvaardiging na Suid-Afrika te nooi om hom daarvan te vergewis dat die uitbreking van bek-en-klouseer nie die nasionale wolskeersel bedreig nie.
NASPEURBAARHEID
Volgens Du Toit moet die wolbedryf hom toenemend op die naspeurbaarheid van sy produk toespits. Die boere wat suiwer Merinowol lewer, sal die vrugte pluk. Die wol van kruisrasse moet afsonderlik gebaal en duidelik gemerk word.
Mnr. Cobus de Jager, Vrystaatse voorsitter van die NWKV, het gesê mens, dier en die omgewing moet eties en verantwoordelik hanteer word in die produksie van wol as uitvoerproduk. “Die omgewing moet op ’n volhoubare manier bestuur word. Vergeleke met die ander uitvoerbedrywe, moet ons erken dat daar ’n behoefte aan ’n ouditstelsel in die wolbedryf is om die naspeurbaarheid te waarborg.”
Die Vrystaatse NWKV het sy geldsake aansienlik verbeter en op ’n gunstige saldo vir 2018 afgesluit, nadat ’n tekort van R127 000 twee jaar gelede op sy begroting aangeteken is.
Mnr. Herman Archer, ondervoorsitter, volg De Jager as voorsitter op nadat De Jager vier jaar as voorsitter gedien het. Mnr. Dennis Louw is tot die nuwe ondervoorsitter verkies.