BEDRYFSORGANISASIES WIL STRYDBYL BEGRAWE
DIE rooivleisbedryf sal doodbloei sonder samewerking, het mnr. Dewald Olivier, uitvoerende bestuurder van die Suid-Afrikaanse Voerkraalvereniging, op die organisasie se jaarkonferensie in Bloemfontein gewaarsku.
Hy het sy geesdrif uitgespreek oor die nuwe gees van samewerking tussen die verskillende bedryfsorganisasies in die waardeketting, en meen dis belangrik om bande te smee met die Rooivleisprodusente-organisasie (RPO) en die Rooivleis-abattoirvereniging tot voordeel van die land se rooivleiswaardeketting.
“Ons kan nie sonder mekaar bestaan nie. In die verlede het onderlinge twis die produksietoestande vir boere, asook vir voerkrale, ondermyn.”
Olivier meen sekere doelstellings is groter as die onderskeie instellings in die bedryf. “Ons besef samewerking is noodsaaklik, soos met die onlangse hantering van die uitbreking van beken-klouseer. Benewens die samewerking met die regering, was die interaksie tussen die belanghebbendes in die bedryf fenomenaal.”
Volgens hom beëindig dié benadering die binnegevegte wat die rooivleisbedryf tot dusver vertroebel het.
PRYSE EN BEMARKING
Die voortdurende vingerwysery oor die prysvlakke van speenkalwers is vir Olivier een van die strydpunte.
“Dit is egter ’n normale uitvloeisel van die ekonomiese beginsel van vraag en aanbod wat die prys bepaal,” het hy gesê.
Die bedryf moet eerder sy aandag toespits op bemarking aan ’n geskikte verbruiker, asook op watter snitte gekonsentreer word. “Ek besef dat prys vir almal uiters belangrik is, maar dit kan deur niemand anders as die ekonomie bepaal word nie.”
Mnr. James Faber, ondervoorsitter van die RPO, het gesê dat ou koeie nie verder uit die sloot gegrawe moet word nie.
“Laat ons tot die bevordering van die rooivleisbedryf bydra en sorg dat elke verbruiker ’n stuk rooivleis op sy bord geniet. Daardeur word die hele waardeketting gestimuleer.”