WATERWESE ‘KAN NIE MEER SA SE WATER BESTUUR’
DIE departement van waterwese en sanitasie het nie meer die vermoë om water in Suid-Afrika te bestuur nie.
So het mnr. Wayman Kritzinger, voorsitter van Agri SA se afdeling vir natuurlike hulpbronne, op ’n Agri SA-terugvoersessie in Centurion gesê, en bygevoeg Agri SA probeer help om die bootjie vaarbaar te kry.
“As ons dit nié doen nie, sal daar meer probleme met watergehalte kom. Daar sal nog minder kennis wees oor hoeveel water daar in die land is en hoeveel gebruik word.”
Mnr. Janse Rabie, hoof van die afdeling, sê die landbou is altyd in die spervuur, omdat hy die grootste verbruiker van water is. “Die feit is dat boere eintlik die hiënaaandeel van water kry. Nadat die nywerhede en myne gehelp is, kry ons dit wat afloop voor dit die see bereik.”
BEDREIGING
Volgens hom is daar deurentyd gerugte oor die bedreiging van boere se watergebruikregte en die hersiening van die regulasies waarvolgens lisensies toegeken gaan word.
“Intussen kan die regering nie sê hoeveel water in die land beskikbaar is nie. Die landbou bly egter in die spervuur as die grootste verbruiker. Grond en water is nouer ineengeskakel as wat mense besef. As daar oor die onteiening van grond gepraat word, gaan dit ook gepaard met die wegneem van watergebruikregte.”
Rabie het verwys na hofsake waarby Agri SA betrokke is, waarvan die uitkoms rigtinggewend kan wees.
Agri SA en die Suid-Afrikaanse Vereniging van Waterverbruikersverenigings (SAVWV) het ook op 13 Maart hul lang samewerkingsverhouding met ’n memorandum van verstandhouding herbevestig.
Dié twee organisasies werk saam vir die verbetering van waterhulpbronbestuur déúr die nasionale regering, opvangsgebiedbestuursagentskappe en waterverbruikersverenigings.
Luidens ’n verklaring deur Agri SA gaan die twee organisasies saamwerk om die ontwikkeling van ondersteuningsmeganismes vir waterhulpbroninstellings te bevorder. Hulle wil ook die kapasiteit van kommersiële en opkomende Suid-Afrikaanse boere verbeter, en verseker dat almal water doeltreffend benut.
SKALIEGAS
Agri SA is ten nouste betrokke by die kwessie van aansoeke vir skaliegasontginning. Sy regskoste in die saak teen Rhino Oil and Gas se aansoek om prospekteringsregte kan tót R1,35 miljoen beloop.
“Die regering het ’n groot aptyt vir gasontwikkeling. Ons is nie gekant teen skaliegas as sodanig nie. Wat ons wél bekommer, is dat die regering nie kan sê waar die groot hoeveelhede water wat nodig is, vandaan gaan kom nie. Ons is ook bekommerd oor die besoedeling waarmee dit gepaard gaan.”
Hy sê die howe is die laaste uitweg waartoe Agri SA hom wil wend, maar dat dit soms onvermydelik is. Heelwat regsgedinge word vanjaar verwag.
—
‘As daar oor die onteiening van grond gepraat word, gaan dit ook gepaard met die wegneem van wategebruikregte.’