Skaapdief se sterfte belig veediefstalprobleem
DIE lyk van ’n vermeende skaapdief wat op die plaas van mnr. Greg Miles in die distrik Stutterheim, sowat 80 km van Oos-Londen, gevind is, het die grootskaalse voorkoms van veediefstal in hierdie gebied fel belig.
Kapt. Siphokazi Mawisa, polisiewoordvoerder in die Stutterheimdistrik, sê egter die kwessie van veediefstal is “beheerbaar.”
Miles en van sy werkers het op Maandag 11 Maart op die ontbinde lyk van mnr. Odwa Maseti (29) afgekom terwyl hulle na verlore skape in ’n digte wattelbos gesoek het. Volgens Mawisa is ’n dossier geopen, maar nié ’n moorddossier nie. Dit wil voorkom of die oorledene sy eie lewe geneem het.
Eers nadat Maseti deur sy ouers by die polisie as vermis aangemeld is, het sy twee broers en ’n vriend aan die polisie gesê dat hulle op 13 Februarie saam met hom na Miles se plaas is om skape te steel, en dat hy in die mis verdwyn het.
“Die betrokke mans is in hegtenis geneem en die polisie se opsporingseenhede het Miles se plaas gefynkam, maar kon geen spoor van Maseti vind nie.
“Nadat mnr. Miles hom gevind het, het hy die polisie in kennis gestel. Maseti het aan ’n boom met ’n tou om sy nek gehang.”
DIEREMISHANDELING
Miles het aan Landbouweekblad gesê dat Maseti se ouers hom bedank het omdat hy en sy werkers hul seun se liggaam gevind het. “Hulle het sy gees hier op die plaas kom haal.” Maseti is intussen begrawe.
Miles gaan nou ’n klag van dieremishandeling teen die drie verdagte skaapdiewe lê, nadat ’n skaap in ’n haglike toestand, vasgebind aan ’n boom, gevind is. “Ons probeer nog om die dier se lewe te red.”
Ván Miles se bure, wat ook erg onder veediefstal deurloop, sê reguit dat die veediefstalprobleem glad nie so “beheerbaar” is soos die polisie voorgee nie. Hulle glo ook dat Maseti se lyk geplant is. “Die man het aan ’n lae tak gehang, naby die boomstam. Hy sou homself maklik kon bevry.”
Nog ’n boer van die omgewing glo dat veediefstal deur sindikate vanuit die tronk georkestreer en beheer word. “Veediefstal het die afgelope 5 tot 10 jaar met rasse skrede toegeneem, én meer gesofistikeerd geraak. Binne twee uur nadat ’n skaap gesteel is, is hy afgeslag en in sy afsetgebied. Daar is veediefstalnetwerke aan die stuur van sake.”
PLANNE
Mnr. Douglas Stern, president van Agri Oos-Kaap, sê sy organisasie het wel planne waarmee hulle hoop om veediefstal hok te slaan.
“In die Oos-Kaap word kameras reeds op strategiese plekke langs paaie opgestel, en deur ’n private maatskappy gemonitor.
Die doeltreffendheid van dié stelsel is onlangs bewys toe twee vroue op ’n plaas by Alexandria aangeval, en die aanvallers binne twee uur aangekeer is. Kameras is al in gebiede soos Alexandria, Grahamstad, Post Retief (Amatola-distrik) en Port Elizabeth opgerig.
“Ek is bewus van Stutterheim se grootskaalse veediefstalprobleem. Die kamerastelsel gaan ook daarheen, én na die res van die Oos-Kaap uitgebrei word,” sêStern.