UITVOERGEWASSE LOK FUTURE FARMERS NA WES-KAAP
WES-KAAPSE boere kan nou maklik en met gemoedsrus opgeleide jong mense met ’n ware passie vir die landbou opspoor en aanstel. Dít is danksy die Future Farmersprojek se nuwe kantoor in die Paarl.
Future Farmers het in 2006 in Howick, KwaZulu-Natal, ontstaan, toe me. Judy Stuart besef het watter uitdaging dit vir jong swart mense is om toegang tot die landbou te kry. Sy het ’n internskapprogram opgestel om hulle voor te berei vir werk in die landbou, wat hulle ook twee jaar se ervaring op kommersiële plase gee.
Stuart verbind die toekomstige boere met kommersiële produsente. Ongeveer 200 plasings vind jaarliks plaas. Daar is selfs geleenthede vir toppresteerders om vir ’n derde jaar op ’n oorsese plaas te gaan werk.
BELANGSTELLING
Volgens Stuart het ál meer jong mense vanaf die WesKaap na Howick gereis om deel te neem aan die program. Me. Nako Ndima, bestuurder van die kantoor in die Paarl, sê talle van die kandidate het spesifiek in gewasse soos druiwe, bessies of kernvrugte belang gestel. Dié tipe plase was nie in KwaZulu-Natal beskikbaar nie. Dit het die idee laat posvat om ’n kantoor in die Wes-Kaap te open.
Volgens Stuart skep die nuwe kantoor nie net beter geleenthede vir jong mense met ’n werklike belangstelling in Wes-Kaapse landboubedrywighede nie, maar is dit ook ’n uitstekende geleentheid vir Wes-Kaapse boere om toegang te kry tot goeie werknemers. Hulle plaas ook mense in die sekondêre landboubedryf, soos by verwerkingsgeriewe.
HARDWERKEND
Een van die Wes-Kaapse boere wat dadelik die geleentheid aangegryp het, is mnr. Angus McIntosh van Spier buite Stellenbosch. Twee Future Farmers werk reeds die afgelope paar maande by hom op die plaas.
“My ervaring tot dusver was uiters gunstig. Judy is ongelooflik daarmee om mense deur te kyk en werklik te verstaan wat dit is wat hulle wil doen, en hulle daarvolgens uit te plaas. Die Future Farmers wat by my werk, is eerlik, hardwerkend en goedhartig.
“Hulle is bereidwillige, geesdriftige en vaardige jong mense. En dis juis die punt – hulle het ’n belangstelling in landbou en leer daarom makliker en vinniger.”
Ndima sê die Paarlse diens is dieselfde as in Howick, maar hulle moet nog woeker om netwerke te bou met oorsese plase in die nuwe bedrywe.
Voornemende kandidate of boere wat by die Future Farmers-projek betrokke wil raak, kan Ndima bel by 060 550 8729.
—