MAAK ’N VERSKIL
Een van die Schoeman-boerdery se nuutste projekte, Zamukele (“aanneem” in Zoeloe), is begin om opkomende droëboonboere as kommersiële verbouers te vestig.
Daarvoor is ’n toegewyde afdeling gevestig wat mnr. Jacques Roos bestuur, genaamd Schoeman-grondhervorming, wat uitsluitlik op die identifisering van en bystand aan hierdie boere toegespits is. Daardeur kry hulle toegang tot saad, kunsmis en die mark (plaaslik en internasionaal). Die bone word dan op ’n kontrakgrondslag aan die boerdery se droëboonaanleg op Delmas gelewer.
In die huidige produksiejaar het 152 kommersiële en 20 opkomende boere in vyf provinsies saam 11 700 ha droëbone vir die Schoeman-boerdery geplant. DIe bone word sy aanleg skoongemaak en vir die inmaakbedryf voorberei.
Dit gaan egter oor baie meer as net die produksie van droëbone. Mnr. Kallie Schoeman haal oudpres. Nelson Mandela aan: “Daar is geen groter geskenk as ’n mens se tyd en energie om ander mense te help, sonder om iets in ruil terug te verwag nie.”
Hy sê hulle is ernstig om ’n verskil te maak en glo dat die herstel van menswaardigheid en ondernemerskap deur die landbou bereik kan word. Benewens die boerdery se droëboonprojek vir kleinboere het Hendrik ook ’n groentetuinprojek wat met die hulp van Umsizi (“helper” in Zoeloe) bedryf word.
Dit is op volhoubare maatskaplike oplossings gerig. Hulle moedig gesinne aan om ’n groentetuin in die agterplaas te begin en leer hulle ook die basiese beginsels van besigheid en entrepreneurskap. Die inisiatief konsentreer op sy werknemers asook die gesinne in woongebiede naby Moosrivier.
Daar is reeds 501 groentetuine op 14 dorpies tot stand gebring, benewens die 189 tuine op Moosrivier, waarvan 89 surplusse produseer en verkoop. “Ons droom is om ’n wesenlike invloed op werkloosheid en armoede in elke gemeenskap binne ’n radius van 200 km om Moosrivier te hê. Ons glo hierdie model kan die menigtes aanraak en hoop gee,” sê mnr. Hendrik Schoeman jr.