SPUIT VANDAG, OES MÔRE
Fitosanitêre vereistes ten opsigte van uitvoerprodukte raak ál strenger, en produsente kan nie meer bekostig om kanse te waag met insekbestryding nie.
Minimum residuvlakke raak al strenger en maak dit moeilik om aan die bogenoemde fitosanitêre vereistes te voldoen.
Bio-Neem is ’n biologiese middel met geen onthoudingsperiode nie, en kan dus regdeur die seisoen toegedien word om vretende insekte te bestry. Dr. Strauss Ferreira van AgroOrganics in Somerset-Wes voer die produk in.
“Bio-Neem bevat neem-olie met azadirachtien as aktiewe bestanddeel. Dit word al honderde jare in organiese landbou vir insekbestryding gebruik.”
Die produk se reuk het ’n afwerende invloed op insekte, met die gevolg dat die insekte se voeding versteur word. Dit inhibeer ook die voortplanting van insekte deurdat eiers nie uitbroei nie. Nimfe se vervellings word versteur en dus gaan die insekte dood en bereik nie volwassenheid nie.
Bio-Neem het geen nadelige uitwerking op natuurlike parasiete nie en is dus baie voordelig in geïntegreerde plaagbestryding, sê Ferreira.
Azadirachtien is ’n kontakdoder en die insekte, nimfe en eiers moet raakgespuit word om doeltreffendheid te verseker. Mnr. Jaco Visser, ’n konsultant van Viking in Citrusdal, beveel aan dat minstens 400 liter per hektaar op gewasse soos rooibostee gebruik word. ’n Oplossing van 500 ml per 100 liter word toegedien.
PRYS: Op aanvraag.