Korting kom op sojaheffing
DIE SAADMAATSKAPPY Bayer gaan boere ’n eenmalige korting van 48% op die nuut ingestelde tegnologieheffing op sojasaad gee.
Die tegnologieheffing van R65/ton is op 1 Maart ingestel by die eerste punt van verkope. Die heffing sal teen 2020 tot R80/ton styg.
Boere het sedertdien daarop gewys dat diegene wat aan die begin van die planttyd nuwe saad gekoop het, reeds as deel van daardie transaksie ’n tegnologieheffing betaal het. Nou moet hulle aan die einde van die seisoen wéér vir die tegnologie betaal in die vorm van die statutêre heffing.
Derhalwe het Bayer onderneem om boere tegemoet te kom deur afslag van 48% op die nuwe produksiejaar se tegnologieheffing (wat ingesluit word in die prys van nuwe saadaankope) te gee.
Dít het aan die lig gekom op ’n vergadering van Graan SA se sojaboon-wegbreeksessie wat onlangs op Nampopark by Bothaville gehou is.
Nuwe sojaboontegnologie sal waarskynlik eers teen 2021 kommersieel in Suid-Afrika beskikbaar wees.
DUBBELE BETALING
Mnr. Arthur Schröder, produkbestuurder van Bayer, het op die Graan SA-vergadering verduidelik waar die oponthoud met die kommersialisering van die nuwe tegnologie lê.
“Ons het versoeke gehad om nuwe biotegnologiese kenmerkte spesifiek vir Suid-Afrika te ontwikkel. Soos die plaaslike sojaboonboere weet, is daar oorsee reeds nuwe biotegnologie beskikbaar, soos Intacta, Roundup-R2 en die uitgebreide Roundup-R2 wat meer dikamba bevat en verskillende onkruiddoderopsies bied.”
Hy het gesê Bayer spits hom daarop toe om nuwe biotegnologie, soos Intacta Roundup-R2, na Suid-Afrika te bring. Daar is egter heelwat regulatoriese prosesse, onder meer plaaslike proewe, wat moet plaasvind voordat die tegnologie beskikbaar gestel word.
“Ons werk saam met die regering om ’n permit vir die plant van proefgewasse te kry en te bewys dat dit regtig hier sal werk. Daar is twee dinge wat ons moet bewys, naamlik dat daar geen fitotoksiese uitwerking is nie en dat dit Afrika-bolwurm (Helicoverpa armigera) bekamp.”
AFRIKA-BOLWURM
Dis veral laasgenoemde kenmerk wat vanjaar ’n bietjie moeiliker is om te bewys. Boere het op die vergadering vertel dat hulle, anders as in ander jare, vanjaar baie min bespuiting teen Afrika-bolwurm moes doen.
“Laas jaar het ons tot drie keer bespuit, maar met vanjaar se droogte het ons heelwat minder bespuit, wat eintlik uitsonderlik is,” het mnr. Cobus van Coller, ’n boer van Viljoenskroon, gesê.
Schröder het in reaksie gesê dit sal dalk nodig wees om ’n brief van boere by die permitaansoek in te sluit waarin die uitsonderlike droogtejaar se uitwerking verduidelik word.
“As alles goed gaan, sal ons die aansoek vanjaar indien, en as die regulatoriese goedkeuring daarop volg, sal maatskappye in 2020 saadkultivars met die nuwe kiemplasma kan indien vir registrasie. Die eerste kommersiële gebruik sal eers teen 2021 kan plaasvind. Dit lyk nie of dit enigsins vroeër kan wees nie vanweë die proses wat gevolg moet word.”
DRIE MAAL STROOP
Hierop het boere wat die vergadering bygewoon het, gesê dit kan beteken dat hulle drie maal gaan stroop en heffings betaal voor die nuwe tegnologie vir hulle beskikbaar is, terwyl daar nou vir die ou tegnologie betaal word. Hulle vra dat daar deursigtigheid moet wees oor die wyse waarop die geld aangewend word.
Mnr. Corné Louw, senior ekonoom van Graan SA, het gesê boere is nou bemagtig met die inligting oor die afslag en moet seker maak hulle kry dit wanneer hulle saad vir die nuwe produksiejaar bestel.