Dié week in die landbou

Die Paarlse wynmakery Nederburg is die vierde agtereenvolgende jaar op Drinks International se gesogte lys van die 50 mees bewonderde wynhandelsmerke ter wêreld. Hy was vanjaar ses plekke laer as verlede jaar, op 47. KWV, nóg ’n bekende wynmaker van die Paarl, is nommer 45 – soos verlede jaar. Dit plaas dié Kaapse kelders in uitgelese geselskap, soos Australië se Penfold en Spanje se Torres, wat onderskeidelik die eerste en tweede plek beklee. Meer as 200 van die wêreld se voorste wynhandelsmerke word vir die lys oorweeg. Om ’n plek daarop te behaal, moet ’n handelsmerk deurlopende of beter gehalte toon, die land van oorsprong weerspieël, reageer op sy teikenmark se behoeftes en smake, en uitstekende bemarking en verpakking hê. Die opname word gedoen met die hulp van Wine Intelligence, ’n spesialis-wynbemarkingsnavorsing-en-konsultasiemaatskappy. Grondbesettings, die diefstal van skrootmetaal, koperkabels en sinkplate, en ander misdaadprobleme op plase is van die kwessies wat Agri SA gevra het in die staat en die georganiseerde landbou se gesamentlike landelike veiligheidstrategie vervat moet word. Mnr. Tommie Esterhuyse, voorsitter van Agri SA se veiligheidskomitee, sê feitlik alles wat versoek is, is vervat in die strategie wat na verwagting binne die volgende twee maande bekend gestel word. Hy sê die afgelope twee jaar het die Agri Securitas-trust R10 miljoen ingesamel wat vir 45 veiligheidsprojekte aangewend is waarby 3 500 boere en 51 000 plaaswerkers baat gevind het. Dit sluit onder meer veiligheidskameras en kommunikasietoerusting in.