Sommige markte weer oop vir SA beesvleis
DIE Suid-Afrikaanse regering vorder met onderhandelinge om uitvoermarkte vir rooivleis te heropen ná bek-en-klouseer in Januarie in die siektevrye gebied in Limpopo uitgebreek het.
Die departement van landbou, bosbou en visserye het reeds suksesvol onderhandel vir die remediëring van veterinêre gesondheidsertifikate vir beesvleis na Bahrein, Egipte, Jordanië, Katar, Koeweit, Lesotho, Mosambiek, Swaziland en die Verenigde Arabiese Emirate, luidens ’n gesamentlike verklaring van dié departement en die nasionale dieregesondheidsforum.
Varkvleis uit bek-en-klouseervrye gebiede kan ook weer na Lesotho, Mosambiek, Namibië (gedeeltelik), die Seychelle en Swaziland uitgevoer word.
Suid-Afrika se buurlande Namibië en Botswana blyk nog lugtig te wees, maar onderhandelinge om Suid-Afrikaanse beesvleis en varkvleis weer daarheen uit te voer, duur voort.
Die markte vir suiwelprodukte is ook weer grootliks oopgestel. Sommige markte vir die uitvoer van huide, velle en wol word nog beïnvloed en onderhandelinge word voortgesit.
STRENG MAATREËLS
Mnr. Senzeni Zokwana, minister van landbou, bosbou en visserye, het met mnr. Lin Songtian, Chinese ambassadeur in Suid-Afrika, vergader om die handel tussen die twee lande te bespreek.
Albei partye het saamgestem dat strenger maatreëls nodig gaan wees om waarborge vir toekomstige handel te kan bied. China het onder meer in Februarie die invoer van Suid-Afrikaanse wol verbied.
Intussen het nuwe beken-klouseergevalle nog nie weer voorgekom in die epidemiologiese groepe wat gemonitor word nie.
Sowat 13 500 stuks vee is sedert 14 Januarie vanjaar teen die siekte ingeënt in die eertydse bek-en-klouseervrye gebied.