Nuttig & nuut
Hulpbronne raak ál skaarser, en kosprodusente moet dit so doeltreffend moontlik gebruik. Met akwaponika word die minimum water gebruik om groente (en selfs vrugte) van uitstekende gehalte te produseer. Vis word ook in dieselfde boerdery geproduseer.
Mnr. Colin Bremner van Kleinskuur-akwaponika naby Cullinan in Gauteng, het ’n doeltreffende akwaponika-stelsel ontwerp. Die grootte kan aangepas word om in ’n agterplaas te pas, of as ’n volskaalse kommersiële grootte om jaarliks tot 50 ton tilapia en net soveel groente te lewer.
Die stelsel begin by die vistenks. Die visuitskeidings, wat baie voedingstowwe bevat, word gesirkuleer om deur bakterieë in voedingstowwe vir plante omgeskakel te word.
“Die verrykte water word dan in damme gepomp waarop drywende plantskinkborde lê. Die groente word daarop verbou. Lug word ook in die groeibaddens ingeblaas om groei aan te help, en die water word van die plante na die visse hersirkuleer. Binne die stelsel neem dit sowat 500 ml water om 150 g blaarslaai te kweek – dit is 4-5% van konvensionele verbouing se behoefte van sowat 12,5 liter.”
Die stelsel kan geoutomatiseer word sodat kragonderbrekings geen nadelige uitwerking daarop het nie. Watersirkulasie moet egter binne 12 uur hervat word.
Bremner se ontwerp kan tot op ’n stuk grond van 15 m x 6 m opgerig word. ’n Gemeenskapstelsel of semi-kommersiële stelsel benodig 30 m x 10 m.
PRYS: Op aanvraag.