Aftreefondse vir lojale werkers
Dit is in werknemers én werkgewers se belang as boere betroubare werkers help om toegang tot aftreefondse en begrafnisdekking te kry.
Alle werkgewers, ook dié in die landboubedryf, is afhanklik van goeie en betroubare werknemers. Ek is daarvan oortuig dat u as boer deeglik bewus is van alles wat met werknemers kan skeefloop ten opsigte van beserings, ongeskiktheid en afsterwe. Daar is egter ook gevalle waar die plaaswerker sy hele lewe lank vir u gewerk het en nou weens ouderdom of swak gesondheid die tuig moet neerlê.
Die werklikheid van talle plaaswerkers is dat hulle by aftrede, nadat hulle soms tot 35 jaar lank vir ’n boer gewerk het, heel moontlik ’n laaste salaris sal ontvang, daarna vir ’n tydperk werkloosheidsversekering kan eis, maar dan ten volle afhanklik sal wees van die staat se ouderdomspensioen.
Ná die onlangse begroting het laasgenoemde tot ’n skrale R1 780 per maand gestyg. In baie gevalle moet die werker ook die plaas verlaat ná ’n ooreengekome tydperk en self vir ’n nuwe heenkome betaal.
Aftree-hervorming, veral vir plaaswerkers, is al die afgelope paar jaar hoog op die regering se sakelys. Dit hou slaggate vir kommersiële boere in.
Sowat 70% van die ongeveer 600 000 heeltydse plaaswerkers behoort nie aan ’n
aftreefonds nie, maar dit behoort in die nabye toekoms te verander.
DIE OPLOSSING
Dit is nou reeds moontlik vir u as boer om u heeltydse werknemers se voordeelstruktuur aan te pas om voorsiening te maak vir tekortkominge. U voldoen nie net aan moontlike toekomstige wetgewing nie, maar dié voordele kan u ook help om goeie plaaswerkers aan te stel en te behou.
Om dit maklik te maak, is daar deesdae heelwat planne beskikbaar wat die tekortkominge oorbrug. Die planne is nie ingewikkeld nie, hou min uitgawes in en is maklik om te administreer. Die planne is ook bekostigbaar vir die werknemer en -gewer.
Dit kan in werking gestel word vanaf net vyf werkers met ’n minimum bydrae van 8,5% van die werker se loon, wat die boer en plaaswerker in enige verhouding kan deel.
Dit is baie belangrik dat hierdie plan met die werknemer bespreek word en dat enige aftrekkings op skrif ooreengekom word voor dit toegepas word.
Die soort plan waarvoor u en die werknemers in aanmerking sal kom, hang af van hoeveel werknemers in u diens is. Indien dit net vyf werknemers is, sal die plan heel moontlik standaard wees. Alle werknemers sal dieselfde voordele ontvang, en die beleggingskeuses sal beperk word. Hoe meer werknemers aan die plan behoort, hoe meer keuses, opsies en beheer sal vir die boer en plaaswerker beskikbaar wees.
Die planne maak voorsiening vir:
■ Aftrede, lewensdekking en ’n permanente ongeskiktheidsvoordeel wat sonder ’n wagtyd uitbetaal word as die plaaswerker heeltyds ongeskik verklaar word.
■ ’n Tydelike ongeskiktheidsvoordeel wat die boer sal help om die werker se loon te betaal totdat hy weer kan werk.
■ Begrafnisdekking vir die werker en sy naaste familie, asook ’n begrafnisondersteuningsdiens wat help met die vervoerkoste van die oorledene.
Hierdie planne bied ’n uitstekende manier om die plaaswerker eerstens te help om vir sy eie aftrede te spaar. Tweedens kan die werknemer op sy loonstaat sien watter finansiële bydrae sy werkgewer lewer, afgesien van sy salaris. Dit skep ’n langtermynvoordeel en gemoedsrus vir die plaaswerker, sy familie én die boer.
Hoe vroeër hierdie plan in werking gestel word, hoe groter sal die voordeel op lang termyn vir die plaaswerker wees.
Gesels met u geakkrediteerde finansiële raadgewer oor korporatiewe voordele wat aan u en u werknemers gebied kan word. Maak seker dat u volledige inligting bekom oor die verskeidenheid planne wat beskikbaar is, die nasorgdiens van die instelling, toegang tot inligting en die buigsaamheid van die gekose plan sodat u ’n ingeligte besluit kan neem volgens u en u werkers se behoeftes.
Me. Daleen Harris is ’n regsadviseur by Old Mutual se afdeling persoonlike finansies in die noordelike streek.