UINTJIES SONDER GIF OF CHEMIE GEPOOTJIE
Mnr. Chris Pretorius gebruik geen chemiese middels in die grond teen siektes en plae nie. Hy gebruik selfs nie eens meer onkruiddoder nie, omdat dit grondlewe doodmaak. Hy het ’n nuwe stuk grond begin huur waarop rooi-uintjies soos ’n grasperk gestaan het.
Met die hulp van mnr. Freddie Bredenhann, ’n grondgesondheid- en herlewingsboerderykonsultant by Shortlands-landboudienste, kon hulle met biologiese grondregstellings die grondgehalte só verbeter dat die uintjies nou so te sê iets van die verlede is.
Die gebruik van biologiese middels om die rooi-uintjies te bekamp was ’n doelgerigte
besluit om grondlewe te bewaar, maar ook omdat daar weinig chemiese middels beskikbaar is wat doeltreffend daarteen ingespan kan word. Bredenhann het aanbeveel dat 150 kg humate en 60 liter swael per hektaar net ná grondvoorbereiding tot die grond toegevoeg word.
Volgens Bredenhann bring hierdie behandeling mee dat ’n goeie grondstruktuur gevestig word en die grond beter deurlug word. “Rooi-uintjies floreer in grond wat toegeslaan is. Ons maak dus nie die uintjies vrek nie, ons verander bloot die omstandighede om dit vir hulle moeilik te maak om te floreer.
“Die swael (S2-) bind aan die magnesium(Mg2+), kalium- (K1+) en natrium- (Na1+) anione en sorg dat dit geloog word. Hierdie anione bind aan kleideeltjies, wat die grondstruktuur afbreek. Wanneer die kalsium (Ca2+) in die anione se plek aan die kleideeltjies bind nadat die sulfate hul werk gedoen het, flokkuleer die grond in baie groter dele, wat lug en dus suurstofindringing in die grond verbeter. In sulke omstandighede kan die rooi-uintjies nie floreer nie en hulle begin verdwyn,” sê Bredenhann.
Die humate bind ook aan kleideeltjies en help dus verder om die flokkulasie in die grond aan te help.
Pretorius was aanvanklik skepties oor Bredenhann se planne. “Dit is nou twee jaar later en die rooi-uintjies is bykans nie meer teenwoordig op daardie land nie.”
Bredenhann het al vantevore hierdie resep met geel-uintjies probeer, maar nie dieselfde resultate gekry nie.