Steytlerville pak die droogte aan met ’n fees
SOEK jy raad oor hoe om jouself en jou boerdery deur die droogte te kry? Het jy innoverende produkte of metodes wat jy kan aanbied om in moeilike tye te oorleef?
Dr. George Craven, boer van die plaas Noorspoort langs die Grootrivier net buite Steytlerville in die suidoostelike Karoo, sê dis waarom die Steytlerville-toerismevereniging op 28 Maart 2020 ’n droogtefees op die dorp gaan hou. Die fees heet HI- (hoop en inspirasie) Droogtefees. Die doel is nie om geld te maak nie, maar om belangstellendes en belanghebbendes te nooi om die dorp te besoek om deel te neem en só ’n bydrae te lewer.
HOOP EN INSPIRASIE
Hy sê die oogmerk is om boere en ander hoop te gee en te inspireer oor hoe hulle droogtes beter kan oorleef. Die uitstallers en kenners sal hul produkte en idees bekend stel, veral idees “buite die boks”, soos erdwurmboerdery, hoe om water te kondenseer en doeltreffender aan te wend, parakiete te teel, opsies vir tru-osmose en geldmaakgeleenthede op die internet.
“Daar is baie wat gedoen kan word, maar moeilike tye het ’n manier om geesdrif en inisiatief te demp – vandaar die naam HI (Hoop en Inspirasie).
“Die toerismevereniging wil ons gemeenskap, streek en land help om by die nuwe werklikheid van die droogte aan te pas. Ons beoog om diensverskaffers en vervaardigers te kry wat hul produkte in die landbousaal en op die sypaadjies kan uitstal. Praatjies
sal ’n wye reeks onderwerpe dek, van die voer van vee op swak veld tot die sink van boorgate en die sielkunde van droogte.
“Dit sal ons nie verbaas as die fees ’n paar oorspronklike benaderings of gedagtes oplewer nie, of dit intussen goed reën of nie.” * Bel dr. George Craven by 578 5503.