SA se topveeboere vereer
SUID-AFRIKA se voorste skaapen beesboer vir 2019 is meesters in diversifikasie en waardetoevoeging met hul veevertakkings.
Mnr. Cobus van Coller en sy vrou, Magdel, van Viljoenskroon in die Vrystaat, is aangewys as die 16de Skaapboer van die Jaar en mnre. Tian Kruger en Pieter Moolman van Roedtan as die 17de Beesboer van die Jaar. Die pryse is deur Voermol, BKB, FNB, Zoetis en Landbouweekblad geborg en in Bloemfontein oorhandig.
Op hul plaas Libanon bedryf die Van Collers hul veevertakking in harmonie met bewarings boerdery praktyke vir volhoubare winsgewendheid in ’n gebied waar hoofsaaklik met graan geboer word. Hulle het besef gewone bewerkings praktyke is nie’ n teenvoeter vir erosie nie. Hulle benut nou kommersiële Suid-Afrikaanse Vleismerino’s en ’n beeskudde om die risiko van hul graanverbouing te beperk.
“Pleks daarvan om voer op te berg en vee ten duurste in krale te voer, sien ek my hele plaas as ’n voerkraal. Die vee bewei die veld, oesreste op die lande, weimielies en dekgewasse. In ruil kry ek vleis as ’n groeikomponent, bemesting van grond en kontantvloei.”
Libanon het puik hantering s geriewe met radio frekwensie-hulpmiddels ,’ n outomatiese voer-en-waterstelsel in die lamhokkies, en skrophoenders om parasiete te bekamp.
TOPBEESBOER
Die Tian Kruger-boerdery se vrugte- en gewasverbouing is tussen Groblersdal en Marble Hall in die Loskop-besproeiingskema in Limpopo geleë. Kruger se liefde vir beeste het daartoe gelei dat hy sy boerderyrisiko met ’n Bonsmarakudde by Roedtan verskans.
Onder Kruger se wakende oog bedryf Moolman die kommersiële kudde met die beginsels van ’n stoetery ten opsigte van rekordhouding. Die kriteria waarvolgens Moolman die vroulike diere uitskot, is vrugbaarheid, bouvorm, ouderdom en kalfspeengewig om langlewende, vrugbare koeie in die kudde te hê wat kalwers met ’n goeie bouvorm oplewer.
Koeie word vir kunsmatige inseminasie gesinchroniseer. Die kriteria vir die bulle wat slegs by stoettelers aangeskaf word, is bouvorm, aanpasbaarheid, teelwaardes en groei.
Die boerdery spog met ’n gemiddelde speenpersentasie van 87 oor drie jaar en ’n tussenkalfperiode van 379 dae.
Die naaswenners in die skaapkategorie was mnre. Frans en Andries Marx van die FEMDohne-Merino’s, Burgersdorp, Oos-Kaap, en Dirk Hanekom van Korenhof-Merino’s, Bredasdorp, Wes-Kaap.
Die naaswenners in die beeskategorie was mnre. Burnie Staal van Bos Blanco-Brahmane, Kroonstad, Vrystaat, en Jason Carroll van BoschendalAngus, Simondium, Wes-Kaap.