‘DIÉ INVOER BRING RISIKO’S’
Die invoer van grootmaatpakke bevrore hoender moet verbied word, sê die teenstortingsbeweging FairPlay. Dié soort invoer word deur die departement van gesondheid toegelaat, maar die organisasie sê die pakke word hier ontdooi en die snitte herverpak om plaaslik versprei te word, wat voorkombare gesondheidsrisiko’s skep.
“Plaaslike hoendervleis het etikette wat naspeurbaarheid in geval van besmetting verseker. Dit is skandelik dat ingevoerde hoender vaag geëtiketteer kan word as dit van ’n aantal lande kom,” sê FairPlay. Dié organisasie het, in reaksie op die pluimveebedryf se nuwe meesterplan, gesê die staat moet geld vind sodat die departement van landbou, wat verantwoordelik is vir gesondheids- en voedselveiligheidstoetste by buitelandse produksie-aanlegte en van ingevoerde besendings, se inspeksies so goed soos ander lande s’n kan wees.
Mnr. Paul Matthew, uitvoerende hoof van die assosiasie van vleisinvoerders en -uitvoerders (Amie), sê dié organisasie is teen enige praktyke om ingevoerde hoendervleis te ontdooi.
Regulasies daaroor en oor naspeurbaarheid moet afgedwing word en die skuldiges swaar gestraf word, sê hy.
Amie werk nou saam met sy lede om seker te maak hulle kom standaarde na, maar nie alle invoerders is Amie-lede nie.
“Ons het aan die regering voorgestel om dit selfs te oorweeg om die invoerlisensies van diegene wat verskeie reëls oortree, vir ’n beduidende tydperk terug te trek,” sê Matthew.