Wees ’n rentmeester van dié sonneblomtegnologie
Deur goeie rentmeesterskap keer boere dat onkruid weerstand opbou teen die werking van die tegnologie wat in Clearfield®-sonneblomme voorkom.
Om aan die vereistes van goeie rentmeesterskap en boerderypraktyke te voldoen, moet die boer tegnologie verantwoordelik gebruik. As hy dit nie doen nie, kan hy die periode waarin tegnologie doeltreffend is, verkort. Clearfield®-sonneblomme vergemaklik onkruidbestryding aansienlik, maar net as die boer dit volgens voorskrif plant.
Die ingeboude onkruiddoderweerstand van Clearfield®sonneblomme is die gevolg van ’n natuurlike mutasie. (Dié basters is nie geneties gemodifiseer nie. Alle sonneblombasters is GM-vry.)
Sonneblombasters met die Clearfield®Plus-eienskap (’n hoë oleïensuurinhoud) ding boonop uitstekend mee met gewone sonneblomkultivars en bied aan die boer ’n alternatiewe keuse in gewasverbouing sonder dat hy opbrengs per hektaar hoef prys te gee.
“Nuwe ontdekkings van nuttige molekules of genetiese eienskappe van plante gebeur nie oornag nie. Die proses om die doeltreffendheid, omgewingsimpak en verbruikersveiligheid van ’n produk te toets, duur jare – maklik tien jaar of langer,” sê me. René Jacobs, portefeuljebestuurder vir gewasbeskerming by Corteva Agriscience.
“Ons wil hê die boer moet suksesvol wees en die verbruiker moet kos eet wat skadeloos is. Dit is waarom kommunikasie met boere deur ons agente en landboukundiges belangrik is, sodat die boer besef hoekom hy die produketiket se aanwysings moet volg. Sonder die nodige kennis van die regte omstandighede vir die gebruik van ’n produk kan rentmeesterskap nie bereik word nie.”
RENTMEESTERSKAP
Die gebruik van Clearfield®sonneblombasters saam met die breëspektrum-onkruiddoder Euro-Lightning® (reg.nr. L8436, Wet 36 van 1947) word wêreldwyd aanvaar.
Euro-Lightning® bied doeltreffende ná-opkomsbekamping van ’n wye spektrum gras- en breëblaaronkruide. Die chemiese maatskappy BASF het ooreenkomste met toonaangewende internasionale saadmaatskappye aangegaan om die tegnologie in hul basters in te sluit.
Daar is wel streng riglyne vir die verbouing van Clearfield®-sonneblomme:
■■Verbou dit in ’n driejaar-wisselboustelsel met ander gewasse, soos koring, mielies of sonneblomme wat nié Clearfield® is nie.
■■Onderbreek die siklus van sonneblomproduksie.
■■Pas goeie agronomiese praktyke toe om siekte- en insektedruk by die sonneblomme te beperk.
■■Gebruik onkruiddoders met ’n alternatiewe werkingsmeganisme (wat nie die ensiem asetolaktase-sintase-inhibeerder bevat nie) by sonneblomme in die wisselboustelsel, soos ’n groeireguleerder of ’n fotosintese-inhibeerder.
■■Gebruik ’n onkruiddoder met ’n alternatiewe meganisme van werking om opslagClearfield®-sonneblomme en ander ALS-weerstandige plante te bestry.
■■Beperk die uitsluitlike gebruik van ALS-onkruiddoders tot nie meer as twee uit vier jaar op dieselfde landery nie.
■■Moenie Clearfield®-sonneblomme aanplant op lande met ’n geskiedenis van ’n swaar besmetting van wilde sonneblomme nie. Dit verminder die gevaar van verbastering van Clearfield®-sonneblomme met wilde sonneblomme.
■■Bekamp wilde sonneblomme in landerye, wenakkers en slote aangrensend tot Clearfield®-sonneblomme met nie-ALS-onkruiddoders of deur dit af te sny voor dit saad maak. Dit sal kruisbestuiwing beperk.
■■Bekamp ontkiemende wilde sonneblomme voor die aanplanting van Clearfield®-sonneblomme met nie-selektiewe, nie-ALS-kontakonkruiddoders (by geenbewerkingstelsels) of deur bewerking (konvensionele bewerkingstelsels).
VOLHOUBAARHEID
Die uiteindelike mikpunt van rentmeesterskap is volhoubare produksie en die langdurige gebruik van tegnologie. ’n Holistiese benadering tot verantwoordelike boerderypraktyke sal die tegnologie beskerm en ook die boer se risiko verminder.
Dr. Safiah Ma’ali van die Landbounavorsingsraad se Instituut vir Graangewasse gee raad vir die beste opbrengste met sonneblomme:
■■Aanplantings van November tot middel Desember sal beter opbrengste lewer teenoor laat aanplantings.
■■Vermy swak gedreineerde grond en grond met ’n hoë suurinhoud vir sonneblomproduksie. Plantdigtheid word gegrond op grondtipe, reënval en opbrengspotensiaal. ’n Optimale plantestand van 35 000 tot 42 000 per hektaar met ’n rywydte van 0,91 cm word aanbeveel.
■■’n Wisselboustelsel (twee jaar of drie jaar) met sonneblomme en ander gewasse, soos mielies en sojabone, is noodsaaklik om siektes te bekamp.
■■Kunsmistoediening moet altyd op grondontledings gegrond wees. Indien moontlik moet die helfte van die stikstofaanvulling in planttyd toegedien word en die ander helfte 30-40 dae ná opkoms.
■■Goeie onkruidbekamping, veral in die eerste 45 dae, is noodsaaklik. Die gebruik van Clearfield®-basters laat toe dat boere kort ná opkoms onkruiddoder kan gebruik. Boere moenie nalaat om vooropkoms-grasdoder met planttyd toe te dien nie.