Behaal groot sukses met dié mieliebaster
Talle produsente bespiegel oor die afgelope paar jaar se seisoensveranderinge. Die reënvalpatroon het beslis geskuif en in sekere gevalle was die eerste buie tot ses weke later as gewoonlik.
Die neiging van laat reën is die afgelope seisoen duidelik waargeneem by die Boetina-boerdery, waar mnr. Frikkie Rossouw en sy seuns, Riaan en Jacques, mielies en sojabone verbou. Die boerdery is naby Endicott in die Delmas-landbouverbouingsgebied in Mpumalanga. Die Rossouws is die afgelope ses jaar streng toegespits op bewaringsboerdery.
Hulle het die afgelope drie seisoene begin eksperimenteer om vinniger basters te toets omdat dit al hoe later begin reën. Die optimale planttyd was altyd van middel Oktober tot einde November. Sommige produsente plant ook tot middel of selfs einde Desember. Die Hoëveld het egter net ’n beperkte aantal hitte-eenhede wat nodig is om ’n suksesvolle oes te verbou.
Die gemiddelde reënval vir verlede Oktober was 50,7 mm en vir November 56,7 mm, wat tradisioneel die optimale planttyd was. Die totale gemiddelde reënval vir die plaas was ’n skamele 493,71 mm van verlede September tot einde April vanjaar. Planttyd het gepaardgegaan met droë grondprofiele en baie koue oggendtemperature, wat ontkieming benadeel het.
Die Rossouws se besluit om DKC64-54BR by hul pakket in te sluit, het ondanks die moeilike seisoen goeie vrugte afgewerp. Hulle het DKC64-54BR, wat eintlik ’n ultrakort besproeiingsbaster is, op groot skaal onder droëlandtoestande aangeplant.
Hulle is só tevrede dat hulle beoog om in die toekoms ’n derde van die boerdery se oppervlakte met DKC64-54BR te beplant.
Wat dié baster eiesoortig maak, is dat dit buitengewone strestoestande kan weerstaan, anders as ander ultrakort basters. Hierdie baster het sowat 114 dae tot fisiologiese rypheid nodig, maar droog stadiger af omdat die kop 18 tot 20 rye vorm. Die baster is in die Noord-Kaap ontwikkel en kan dus uiterste klimaat hanteer.
Die baster bevat ook Yieldgard® MAIZE2-tegnologie, wat die hoë stronkboorderbesmetting volkome bestry het. Die koue planttoestande het van die vooropkomsen ná-opkoms-onkruiddoders se werking belemmer, maar danksy Roundup Ready®MAIZE2-tegnologie kon die onkruid baie makliker met glifosaat bestry word.
Die Rossouws het afgelope seisoen 170 ha DKC64-54BR aangeplant, met plantdatums wat gewissel het van 17 Oktober tot 28 November na gelang van die verspreide reënval.
Die beoogde plantestand was 52 000 per hektaar, maar weens die koue en droë toestande het lande se finale plantestand gewissel van 45 000 tot 48 000 plante per hektaar.
Ná ’n moeilike seisoen is ’n gemiddelde opbrengs van10,23 t/ha behaal. Bayer se nuwe Fieldview-tegnologie is gebruik om die opbrengs te bepaal en te bevestig. Die Boetina-boerdery het hierdie tegnologie in 2017 begin gebruik en is een van Fieldview se trotse ambassadeurs.
Riaan sê hulle behaal sukses met DKC64-54BR omdat die baster alle uiterste weerstoestande en stres kan weerstaan. Resultate is nie dadelik gesien nie, maar met deeglike proewe kon die landboukundige span van Bayer en die Boetina-boerdery ’n gemaklike aanbeveling vir die baster bepaal.
Bayer bedank die Boetinaboerdery vir sy toegewyde ondersteuning.
Mnr. Jaco van Zyl is ’n landboukundige vir Bayer Crop Sciene SA.
‘n Hoogtepunt op die 2020 landboukalender is die AFRICA AGRI TECH konferensie en tegnologieekspo wat vanaf 18 tot 20 Februarie in Pretoria gehou word. Dié geleentheid plaas die vergrootglas op tegnologie in landbou.
Africa Agri Tech bied drie dae van ongeëwenaarde verkenning, ontdekking en netwerkgeleenthede. Die hooffokus is op internasionale wetenskaplike en tegnologiese vordering en hoe dit agribesigheid in suidelike Afrika kan beïnvloed en verbeter.
Van produsente, beleidsmakers, ontleders en beleggers tot verwerkers en verspreiders, Africa Agri Tech bring die hele waardeketting byeen om wetenskap, tegnologie en toekomstendense se impak op die landbousektor te ondersoek.
Bo en behalwe netwerkgeleenthede vir leiers in die openbare- en private sektor en navorsingsvelde regdeur die landboubedryf, sal hoë-vlak konferensies en werksessies oor die drie dae van die ekspo aangebied word. Uitstallings en tentoonstellings van al die nuutste tegnologie en toerusting en ‘n demonstrasielokaal waar toerusting beproef word, beloof om besoekers nie teleur te stel nie.
‘n Konferensie oor toekomstendense en tegnologieë, werksessies oor sektorspesifieke onderwerpe, asook ‘n Afrikadag-viering met ‘n opvoedkundige, inklusiewe program vir nuwe toetreders is verdere hoogtepunte.
Verder sal ‘n sosiale program vir bedryfsinteraksie en toekennings sorg, en Suid-Afrikaanse innoveerders sal in ‘n kompetisie meeding vir die titel as SA se beste.
Uitstallers en borge sal van voorleggingslokale gebruik kan maak vir aanbiedings aan fokusgroepe. Daar sal ook buitebesoeke aan uitgesoekte navorsingfasiliteite gebring word.