WAT EET ONS VANAAND?
Die somer is om die draai en ons is lus vir kos wat ’n bietjie ligter is en vinnig om te maak. Stel hierdie week een van ons toetskombuis se maklike, geurige aandetes op die proef.
Tamatie-blatjanghoender
Dié hoendergereg het ’n uur in die oond nodig, maar die voorbereidingswerk duur net 5-10 minute. Maklik, voedsaam en gelaai met geur. Al wat jy hierby hoef voor te sit, is ’n bak rys of koeskoes en dalk ’n groenslaai.
8 hoenderstukke
Sout en varsgemaalde swartpeper
45 ml olyfolie
1 groot ui, gekap
pak (125 g) spekvleis, gesnipper
3 knoffelhuisies, gekap
1 blik (410 g) kersietamaties in sap
OF gekapte tamaties
250 ml blatjang
125 ml water
Vars kruie na smaak
Voorverhit die oond tot 180 °C. Druk die hoenderstukke met kombuispapier droog en geur goed met sout en peper. Verhit die olie in ’n pan en braai die hoenderstukke tot goudbruin. Skep die hoender in ’n oondbak uit.
Braai die uie en spekvleis in dieselfde pan waarin die hoender gebraai is tot halfgaar. Voeg die knoffel by en braai verder tot die spek en uie gaar is. Voeg die tamaties, blatjang en water by en laat kook onbedek vir 10 minute, terwyl die boom van die pan geskraap word.
Skep die tamatiesous oor die hoenderstukke in die oondbak. Bedek met foelie en bak vir 30 minute. Haal die foelie af en bak vir ’n verdere 30 minute tot die hoender sag en goudbruin en die sous afgekook en geurig is. Sit voor met rys, koeskoes of kapokaartappels. Lewer 6 porsies.
Kassler-enaspersiesgebak
Ek het altyd ’n paar pakke kasslertjops in my vrieskas. Dis nie net vinnig om gaar te maak nie, maar dis so veelsydig en kan op verskillende maniere voorberei word. In die lente, as aspersies volop en nie so duur is nie, hou ek daarvan om hierdie gereg te maak. Aspersies en gerookte varkvleis is ’n wenkombinasie. Die romerige sous wat in die oondbak vorm terwyl die tjops bak, vul dit alles net verder aan. Gestoomde baba-aartappels en ’n mengelslaai is lekker bykos vir hierdie ete.
4-6 groot kasslertjops
Skoon water
2 bossies vars aspersies, onderste punte afgesny
250 ml room
2 knoffelhuisies
250 ml vars witbroodkrummels
30 ml olyfolie
45 ml fyngerasperde parmesaankaas
Sout en varsgemaalde swartpeper
Voorverhit die oond tot 190 °C. Laat lê die kasslertjops vir 10 minute in skoon water, haal uit en druk droog. Sit die tjops in ’n gesmeerde oondbak en gooi die water waarin dit gelê het weg.
Blansjeer die aspersies vir ’n paar sekondes in kokende soutwater. Skep uit en rangskik dit tussen die kasslertjops in die oondbak. Meng die room en knoffelhuisies en giet dit oor alles. Bedek die bak met foelie en bak vir ongeveer 15 minute.
Terwyl die tjops bak, meng die krummels, olyfolie, kaas, sout en peper na smaak. Haal die tjops uit die oond, haal die foelie af en sprinkel die krummels egalig oor alles. Sit die bak terug in die oond en bak vir ’n verdere 15-25 minute tot die krummels goudbruin en die roomsous afgekook is. Sit dadelik voor met bykos van jou keuse. Lewer 4-6 porsies.
’n Ware randrekker, maar heerlik! En verspotmaklik om te maak.
125 ml melk
4 eiers, geklits
3 snye witbrood, korsies afgesny en grofgebreek
1 houer (250 g) geroomde maaskaas
1 ui, fyngekap
2 knoffelhuisies, fyngekap
125 ml gerasperde cheddarkaas
1 wiel fetakaas, fyngekrummel
2 blikke (170 g elk) tuna in olie, goed gedreineer
Voorverhit die oond tot 180 °C en smeer ’n middelslag-oondbak met botter of olie. Klits die melk en die eiers saam, giet oor die brood in ’n mengbak en laat staan vir 10 minute. Terwyl die brood die melk-en-eiermengsel absorbeer, meng die res van die bestanddele in ’n mengbak. Sodra die melk-en-broodmengsel sag is, voeg dit by die res van die bestanddele en meng goed. Geur na smaak met sout en peper. Skep die mengsel in die voorbereide oondbak en bak vir 30-40 minute tot goudbruin en ferm. Sit louwarm voor met slaaie van jou keuse. Lewer 8 porsies.
Griekse maalvleisen-sampioenskottel
Die Grieke is lief daarvoor om maalvleisgeregte met vars kruie en fetakaas te maak. Hierdie skottel sal in Griekeland seker tipies met gemaalde lamsvleis gemaak word, maar ek het beesmaalvleis gebruik. Weereens is ’n lekker slaai of twee die enigste bygereg wat hierdie geurige skottel vra.
60 ml gesmelte botter
8 groot bruinsampioene
2 uie, fyngekap
45 ml olyfolie, plus ekstra vir afronding
3 knoffelhuisies
250 g beesmaalvleis
5 ml koljander
5 ml komyn
250 ml beesvleisaftreksel
Hand vol vars basiliekruid, fyngekap, plus ekstra vir afronding
Sout en varsgemaalde swartpeper na smaak
2 wiele fetakaas, grofgekummel
Voorverhit die oond tot 180 °C. Giet die gesmelte botter in ’n oondbak. Knak die sampioene se steeltjies af sodat die sampioene bakkies vorm. Pak die sampioene (met die hol kante na bo) op die gesmelte botter in die oondbak. Kap die sampioenstele fyn en braai dit saam met die uie in die olyfolie in ’n pan tot sag. Voeg die uie en knoffel by en braai verder tot sag. Voeg die maalvleis, koljander en komyn by en braai saam tot die maalvleis gaar is. Voeg die beesvleisaftreksel by, verhit tot kookpunt en prut vir 10 minute. Roer die basiliekruid by en geur na smaak met sout en peper. Skep die maalvleismengsel in die uitgeholde sampioene en ook rondom sodat dit ’n egalige laag vorm. Sprinkel die fetakaas oor. Bedek met foelie en bak vir 25 minute. Haal die foelie af en bak vir ’n verdere 20 minute tot die sampioene gaar is en die fetakaas begin kleur kry. Bedruip met ’n bietjie goeie olyfolie en rond af met vars basiliekruid. Sit warm voor. Lewer 6 porsies.