WATER MET WOEMA
Toe mnr. Lieben van der Merwe van die plaas Kleinswartvlei naby Citrusdal in 2002 die plaas se heerlike water onder die handelsmerk Cederberg Aqua begin bemark, sou hy nooit kon droom dit is die begin van ’n onderneming wat sy dogter eendag sou voortsit nie.
“Die water kom uit boorgate sowat 200 m diep uit die grond en word deur Kaapse sandsteen gefiltreer,” sê Van der Merwe.
Die water se natuurlike lae pH-waarde speel ’n groot rol in die heerlike smaak, verduidelik hy. asmaak, wat jou dors les.” Die onderneming het baie nederig begin, toe sy broer, All, vir hom ’n klompie leë botteltjies gegee het.
“Ek het ’n pyp aan ons hooflyn gekoppel en die bottels met water uit die natuurlike bron volgemaak. My ander dogter het daardie tyd die Buffeljags-garage-en-winkel langs die N2 besit en ek het dit daar verkoop.”
Een ding het tot die volgende gelei en nadat Van der Merwe sy eie marknavorsing – veral by diensstasies en padstalle – gedoen het, het hy ’n volwaardige onderneming staangemaak.
Verlede jaar het sy dogter Esmari Schoonwinkel die onderneming oorgeneem en ’n opwindende reeks tonikumwaters met hierdie einste mineraalwater ontwikkel om hul produk-aanbod uit te brei. “Ons wou iets byvoeg, want ná Dag Zero in die Kaap, het baie mense ons mark betree en staan ons nie meer uit nie.”
Die antwoord was tonikumwater, wat lekker genoeg is om op sy eie te drink, maar veral vorentoe smaak saam met ’n goeie jenewer. Die tonikumwater is beskikbaar in vyf geure (elkeen met ’n suikervrye eweknie), waarvan veral boegoe baie spesiaal is.
“Boegoe is inheems aan die Sederberge en eie aan ons kontrei,” gesels Esmari.
Die ander geure is ’n klassieke tonikumwater, suurlemoen, roos en bloubessie.
Dit is beskikbaar in PETbotteltjies van 200 ml wat herwin kan word. Wees op die uitkyk vir die produkte by OK Foods, OK Liquor stores en Kaap Agri-winkels. Dit is aanlyn beskikbaar by www.cederberg
aqua.com (sowat R60 vir ’n sespak).
Op die foto is me. Esmari Schoonwinkel (regs) saam met haar ouers, mnr. Lieben en me. Hester van der Merwe.