NAMIBIË SE KLEINVEEBOER VAN DIE JAAR AANGEWYS
MNR. PIETER VAN SCHALKWYK wat op die plaas Samehaling by Aroab in die suide van Namibië boer, is as die land se eerste Kleinveeprodusent van die Jaar bekroon.
Dié aankondiging is op die jaarlikse kongresse van die Namibiese Lewendehaweprodusentorganisasie (LPO) en Namibiese Landbou-unie (NLU) in Windhoek gemaak.
Van Schalkwyk en sy vrou, Helena, boer ekstensief met Dorpers, Wit Dorpers, Meatmasters en Boerbokke (stoeterye en kommersiële kuddes). Hulle het ook Brahman-Bonsmara-kruisbeeste vir speenkalfproduksie.
Sowat 75% van die boerdery se inkomste kom uit slaglammers en speenkalwers en die res uit die verkoop van stoetskape.
Van Schalkwyk het in 1998 ’n Dorper-inspekteur geword, was van 2000 tot 2008 voorsitter van die Namibiese Dorpergenootskap en dien nou weer op die bestuur. Hy het al op skoue beoordeel, kursusse aangebied en as raadgewer opgetree in Suid-Afrika, Botswana, Amerika, Mexiko, Brasilië, Australië en Nieu-Seeland en het vir ’n tyd saam met die Universiteit van Ghana in Accra gewerk om skaapboere op te lei. In ’n stadium het hy ook saam met twee broers van Australië met Dorpers en Wit Dorpers in dié land geboer.
Hy handhaaf ondanks die droogte en strawwe Kalahari-toestande ’n speensyfer van 100% in die stoeterye én kommersiële skaapkuddes. Die veeverliese is hoog, ruim 10-15%, grootliks in die lamtyd weens roofdiere soos luiperds, groukatte, rooikatte en jakkalse. Die ooie lam in die veld en maak hul lammers daar groot.
Hy boer so naby moontlik aan die natuur en skik die paar-, lamen bemarkingstye van seisoen tot seisoen aan omdat dit gemiddeld net 125 mm per jaar reën en droogtes gereeld voorkom.
Daarom volg hy ’n uiters versigtige weidingstelsel waarin alle kampe gereeld vir ’n jaar rus en tropgroottes per kamp volgens die aard van die seisoen aangepas word. ’n Volledige artikel oor die boerdery verskyn binnekort in Landbouweekblad.