LUGBESPUITING SUKSESVOL IN AMERIKA BEPROEF
’n Wateroplosbare konsentraat-onkruiddoder, Sendero™ 336 SL (reg.nr. L10569, Wet 36 van 1947), is onlangs tydens Landbouweekblad se besoek aan die Noord-Kaap naby Strydenburg bekend gestel, wat baie suksesvol teen prosopis getoets is.
Volgens mnr. Willie Auret, tegniese verkoopsverteenwoordiger vir die landbouchemiese maatskappy Corteva Agriscience, toon proewe dat prosopis suksesvol doodgemaak kán word. “In 1974 was sowat 6 900 ha in die distrik Britstown met prosopis besmet. Dit het binne 17 jaar met 400% toegeneem tot 27 960 ha in 1992.”
Hy meen die produk se pluspunt is dat die aminopiraliedverbinding in die samestelling lank neem om in die plant af te breek, wat prosopis deeglik laat vrek en die kanse op hergroei aansienlik verminder. Die proefmateriaal is in 2015 na Suid-Afrika gebring vir lugbespuitingsproewe.
Dit word lankal suksesvol in Amerika
gebruik om prosopis met vastevlerkvliegtuie en helikopters te bestry. “Die aktiewe bestanddele, klopiralied en aminopirlalied, is baie doeltreffend.”
Auret sê deur proefnemings is vasgestel dat prosopis van einde November tot Maart bespuit moet word. In Amerika word prosopis gemaklik met die produk teen 2 liter/ha bestry, maar vir Suid-Afrika moes ’n bykomende onkruiddoder bygevoeg word vir goeie resultate. Dit verbeter die opname danksy aminopiralied wat aktief bly.
“Ons het vir die eerste keer ’n lugbespuitingskonsep wat werk en toon die stryd teen prosopis kán gewen word.”
Lugbespuiting sal nie die rol van grondspanne vervang nie, en sal net gebruik word by digte stande wat ontoeganklik vir grondspanne is.
Auret sê die tydsberekening van lugbespuiting is baie belangrik vir goeie resultate. Chemiese onkruidbekamping deur lugbespuiting is uiteindelik die goedkoopste metode, asook die mees praktiese om prosopisbesmetting drasties te verminder.