Planne vir hoenderuitvoer na China
DIE pluimveebedryf ondersoek saam met die staat uitvoergeleenthede na China in die lig van dié land se groot vraag na proteïene. China moes weens Afrika-varkpes meer as die helfte van sy varkkudde uitslag.
Rabobank sê in ’n onlangse verslag die groot daling in China se varkproduksie gaan na verwagting in 2020 tot stewige groei in die internasionale produksie van pluimvee en akwakultuur lei.
Mnr. Izaak Breitenbach, hoofbestuurder van die braaihoenderorganisasie van die Suid-Afrikaanse Pluimveevereniging (SAPV), sê China se vraag na diereproteïene bring groot veranderinge in die wêreldhandel in hoenderprodukte mee. Baie meer Amerikaanse en Brasiliaanse hoendervleis word nou na China uitgevoer, wat die prys van dié hoendervleis laat styg.
Dié ontwikkelinge het invoer na Suid-Afrika onlangs begin raak. In September 2018 het Suid-Afrika sowat 51 000 ton hoendervleis ingevoer, teenoor 36 000 ton in September vanjaar.
China bied volgens hom nou goeie uitvoergeleenthede vir die Suid-Afrikaanse bedryf.
“Die SAPV is in gesprek met die departemente van landbou en handel en nywerheid daaroor. Die eerste Suid-Afrikaanse hoenderprodusente is reeds in China om oor volumes te probeer onderhandel.”
Breitenbach sê die bedryf het die regering ook gevra om Suid-Afrika se moontlike hoendervleisuitvoer na China op die afgelope Brics-beraad in Brasilië te bespreek.
MEESTERPLAN
Uitvoer is een van die doelwitte in die pluimveebedryf se eerste meesterplan, wat vroeg in November op pres. Cyril Ramaphosa se beleggingskonferensie in Sandton bekend gestel is.
Die plan is opgestel met insette van die departemente van handel, nywerheid en mededinging, en landbou, grondhervorming en landelike ontwikkeling, asook belanghebbendes, soos die pluimvee- en in-en-uitvoerbedryf. Dit is wyd verwelkom.
Mnr. Paul Matthew, uitvoerende hoof van die assosiasie van vleisinvoerders en -uitvoerders (Amie), sê ’n belangrike deel van die plan is om die bedryf van invoerna uitvoergedrewe te verander – slegs 2% van die plaaslike produksie word uitgevoer.
Sekere dinge moet egter gereed wees om dit moontlik te maak. Die belangrikste is Suid-Afrika se vermoë om te voldoen aan die sanitêre en fitosanitêre vereistes van sy handelsvennote of markte waarheen hy wil uitvoer.
In die meesterplan word ’n teiken gestel dat daar teen einde
Maart 2020 duidelikheid moet wees oor wat die veiligheidsen veterinêre vereistes in die moontlike uitvoer bestemmings is. Suid-Afrika moet daaraan voldoen sodat uitvoer kan begin.
VOERPRYSE
Volgens Matthew is ’n toename in plaaslike produksie en die bestuur van elemente soos die voerprys noodsaaklik om uitvoer lewensvatbaar te maak.
Hy beskou die uitvoer van rou of gaar hoenderborsvleis na die Europese Unie (EU) as die grootste markgeleentheid. “Daar is ’n vraag na die produk. As ons alles gereed kan kry, kan ons in die vraag voorsien en om ons deel van die mark meeding.”
Amie het hom daartoe verbind om bystand te verleen en te help verseker dat aan alle EU-vereistes voldoen word. Hy is verder besig om’ n uitvoerhandel s matriks op te stel wat vir die bedryf as gids oor ander geleenthede in die wêreld kan dien.
“Die Midde-Ooste is ook ’n groot mark waartoe Suid-Afrika toegang kan kry deur die halaal-standaarde in die land as ’n voordeel te gebruik.”
GROTER PRODUKSIE
Breitenbach sê die plaaslike bedryf het 10% ongebruikte vermoëns en kan dit dadelik inspan, hoewel die produksiesiklus ’n sekere tydperk verg voordat meer hoendervleis geproduseer word.
Verder het die bedryf hom in die meesterplan daartoe verbind om R1,5 miljard te belê, wat in die volgende twee tot drie jaar tot groter produksie sal lei.
Daar word in die plan ook voorsiening gemaak vir die bevordering van groter plaaslike verbruik. Ander doelwitte in die plan sluit transformasie in die hele waardeketting in, asook die beperking van invoer en die beskerming van die plaaslike bedryf teen onbillike invoer.