Sukses met verskansing: 10 dinge vir groter graanwins
Die kristalbal van graanverskansing kan dikwels wasig voorkom. ’n Indiepte-ontleding dui daarop dat suksesvolle boere dié 10 sake onder die knie het.
Die suksesvolle en doeltreffende verskansing van graan bly een van die grootste kwessies vir produsente, plaaslik asook internasionaal. Daar is egter produsente wat deurlopend goeie resultate met hul prysrisikobestuur behaal. Wat doen hulle om sukses te behaal en wat kan ons daaruit leer?
Ons het hierdie produsente geïdentifiseer en ondersoek ingestel na die redes vir hul sukses. Die volgende 10 punte kan ander produsente help om goeie besluite te neem en die druk van verskansing minder te maak.
1. DIE VERSKIL TUSSEN VERSKANSING EN SPEKULASIE
Wees bedag daarop om nie die verskansing van jou graan met spekulatiewe transaksies te vermeng nie. Daar is ’n fyn lyn tussen verskansing en spekulasie: Moenie daardie lyn oorsteek nie. Hoe weet jy of jy besig is om te verskans of te spekuleer?
Verskansing het ten doel om jou boerdery se risiko minder te maak en winsmarges op jou fisiese graan vas te lê. Daarteenoor verhoog spekulasie jou risiko met die doel om moontlik – nie waarskynlik nie – wins te maak.
Beoordeel jou verskansingstrategieë en stel uitsluitlik aksies in werking wat jou prysrisiko verlaag.
2. WEES REALISTIES OOR VERWAGTINGE
Navorsing wat in Amerika deur Irwin, Good, Martines-Filho en Batts (2006) gedoen is, het bevind dat twee derdes van produsente hul graan in die onderste derde van die prysband verskans. Hoewel daar nog nie soortgelyke statistieke plaaslik beskikbaar is nie, sal dit heel waarskynlik tot ’n eenderse gevolgtrekking kom.
Niemand weet vooraf waar die pryshoogtepunt vir ’n seisoen gaan wees nie. Pryse verhandel tradisioneel juis op die hoogste vlakke wanneer produksietoestande op die slegste is (en niemand wil verskans nie). Stel ’n realistiese doelwit om ’n bogemiddelde prys vir die seisoen te behaal en meet jou aan die einde van die seisoen teen die gemiddelde prys vir die jaar, nie teen die hoogste vlak waarteen pryse verhandel het nie.
Die afgelope vyf jaar was die gemiddelde
as Julie-witmielieprys volg: (Augustus tot Julie) 2015 R2 363 2016 R4 042 2017 R2 280 2018 R2 051 2019 R2 771
Hoe vergelyk dit met die prys wat jy in die vooruitsig gestel het?