Dié week in die landbou
Die beoogde grondwetwysiging wat onteiening sonder vergoeding moontlik sal maak, verwys net na grond en nie na ander eiendom nie. Dit volg nadat sommige deelnemers aan ’n werksessie van die parlement se ad hoc-komitee wat die grondwetwysiging ondersoek, gemeen het die woord moet verduidelik word en is nie breed genoeg nie. Dr. Mathole Motshekga, voorsitter van die komitee, het gesê in hierdie stadium sal die komitee nie op eiendom in die algemeen konsentreer nie, aangesien dit nie in die komitee se mandaat is nie. Verder sluit sy mandaat nie die voogdyskap van grond in nie. Laasgenoemde was in reaksie op ’n voorstel van die EFF dat die staat voogdyskap van alle eiendom oorneem.
Staatshoofde op die Brics-beraad in Brasilië het hulle op 11 November amptelik verbind tot maatreëls om die onderfakturering van ingevoerde goedere te beveg en om wêreldwye vraag en groei te bevorder. Mnr. Ebrahim Patel, minister van handel en nywerheid, het dié kwessie namens Suid-Afrika uitgelig op die beraad nadat wydverspreide onderfakturering en soortgelyke praktyke wat plaaslike klere-, skoen-, pluimvee-, elektronika- en staalmaatskappye ondermyn, in Suid-Afrika aan die lig gekom het. Patel het in ’n verklaring gesê dié onderneming sal help om die doelstellings van die meesterplanne vir pluimvee en die klerebedryf te verwesenlik.