Nuttig en nuut
Standard Bank bied aan boere twee nuwe satellietgebaseerde oplossings vir afstandswaarneming, naamlik Contour en GRID.
Contour is ’n digitale platform, beskikbaar op selfone en rekenaars, wat presisieboerderymiddels bied waarmee boere inligting kan verkry oor die toestand van hul gewasse.
Mnr. Nico Groenewald, hoof van Standard Bank Landbou, sê dié inligtingsplatform vir afstandswaarneming is toegerus met ’n volledige stel landmoniteringstoerusting wat help om risiko’s te verminder en opbrengs te verbeter deur bedrywighede te optimaliseer.
Deur algoritmes wat beelde ontleed en vertolk, stel Contour data oor plaaslike weerstoestande, landerye se toeganklikheid en blaarvogtigheid beskikbaar, terwyl dit ook optiese satellietmonitering verskaf van die gebied waar geplant is en die groeivordering daar. Dié tegnologie stel boere in staat om groeistadiums te evalueer, opbrengs te voorspel en mettertyd gewasproduksie te bevorder.
Grondmonsters bied boere verdere insig in die toestand van landerye en dui aan of produksiemiddele nodig is om aan spesifieke behoeftes in die grond aandag te gee.
Met GRID kan oesprestasie in verskillende gebiede op ’n saamgevoegde grondslag gemonitor word. Só kan ’n portefeulje se totale aanplantings en verwagte oes nagespoor word, wat byvoorbeeld vir aankoopgroepe nuttige inligting kan wees.
GRID is ’n bekostigbaarde oplossing vir intydse oesmonitering op plase van alle groottes. Dit bied vergelykings van begrote en werklike opbrengsvoorspellings, wat help om onderpresterende landerye te identifiseer.
Contour en GRID kan landwyd gebruik word, mits die boer internettoegang het. Dit is veral geskik vir kontantgewasse op droëland of onder besproeiing.
Die riglynpryse is in Amerikaanse dollar om ook vir ander markte voorsiening te maak. Internasionale betalingsprosesse en voorwaardes is van toepassing.
PRYSE: Contour se Digital-pakket: $2,50 (sowat R36) per ha per jaar; Contour se Precision-pakket: $7,50 (sowat R110) per ha per jaar; en die GRID-pakket: $5 (sowat R73) per ha per jaar.