AGRIPARKE SONDER TOEKOMS
Die agriparke is soos feitlik ál die ANC-projekte tot mislukking gedoem. Die R2 miljard wat vir
die parke begroot is, sal soos baie ander miljarde verdwyn met niks om te wys nie, buiten blaam uitdeel en verskonings maak.
Gelukkig is daar buite die regering baie uitstekende planne om swart boere te vestig en te ondersteun – planne wat werk en sukses waarborg, en wat bestuur word deur ervare mense wat weet wat hulle doen.
Soms wonder ek of daar dan geen verstandige leiers in die ANC-alliansie is wat sulke wildegansjagtogte betyds kan stopsit nie? Gaan hulle aanhou om van ramp tot ramp en krisis tot krisis
voort te ploeter tot Suid-Afrika onomkeerbaar geruïneer is?
Die landbou-ekonoom prof. Johan Willemse en landbouleiers moedig boere aan om hoopvol te bly, en waarsku teen pessimisme. Dit is ’n lofwaardige sentiment, maar as ’n mens om jou kyk, raak dit ál moeiliker om optimisties te wees.
Om die handdoek in te gooi, is egter buite die kwessie. Ons moet vasbyt, uithou en aanhou.
Wanneer die ambisie en selfvertroue van ’n staat se leiers hul bevoegdhede oortref, wag daar moeilikheid. Dit is die geval
in Suid-Afrika. Van plaaslike bestuur tot in die parlement en kabinet is daar geen tekort aan ambisie en eersug nie, maar vaardighede is skaars.
Die land het baie uiters bevoegde mense, maar hulle is in die private sektor. Die ANC waak jaloers oor sy mag, aansien en beheer oor landsake. Kyk net hoe verbete klou hy aan die sukkelende SAA en ander semistaatsinstellings. Pres. Cyril Ramaphosa het gelukkig onlangs begin om begaafde buitestanders te betrek. Mag hy dit op groot skaal doen en gou ook, en in die proses die vakbonde en kommuniste in die alliansie permanent in die bek te ruk, soos Margaret Thatcher van Brittanje gedoen het.
IZAK BERGH
Marchand