ONSEKERHEID KNAAG AAN SOMERSAAIBOERE
AANPLANTINGS in die somerreëngebied is laat weens wisselvallige reën, en die mark is angstig oor wat in die volgende paar weke gaan gebeur.
Die optimale planttyd is reeds verby in verskeie streke en niemand weet wat om van die seisoen te verwag nie.
Wat Mpumalanga betref, sê mnr. Ryk Pretorius, Graan SA-verteenwoordiger wat tussen Davel en Ermelo boer, dit het die laaste twee weke van November redelik wyd en goed gereën, hoewel steeds kol-kol. Teen einde November was mielies volgens hom 99% klaar geplant en sojabone was sowat 60% klaar geplant.
OPVOLGREËN NODIG
“Hoewel jy ná November vir nog sowat ’n week sojabone kan plant, is telkens bewys dat opbrengs begin afneem. Om ná 15 Desember in ons omgewing te plant, is soos om roulette te speel.
“Dit het veral oos van Ermelo goed gereën en die wêreld lyk mooi. Dit is egter baie warm en opvolgreën is nodig.”
Mnr. Boeta du Toit, hoofbestuurder van Agri Noordwes, sê teen einde November was plantbed rywighede in dié provinsie nog beperk. “In die oostelike dele van die provinsie het dit meer gereën en boere in sekere dele kon begin plant. In die sentrale dele was daar minder reën en in die res van die provinsie was die reën baie wisselvallig. Dit was hoofsaaklik donderbuie hier en daar.”
Die eerste somerreën het kolkol in die Vrystaat geval en boere het hier en daar op van hul oorlêlande begin plant, sê mnr. Luan van der Walt, ekonoom van Graan SA.
“Heelwat distrikte in die westelike en sentrale saaigebied wag nog op goeie reën.”
Hy sê ondergrondse vog is grootliks voldoende, maar boere het nou genoeg vog in die bogrond nodig om te kan plant.
In die Suidoos-Vrystaat word baie druk ervaar. Min reën het geval, terwyl die optimale planttyd in dié streek van 15 Oktober tot 15 November is. Volgens reënvalrekords van die weerstasie op Bethlehem het dié distrik van Junie tot Oktober die minste reën in 70 jaar aangeteken.
VOORUITSIGTE
Mnr. Johan van den Berg, landbou weerkundige by Santam Landbou, sê korttermy nvoorspellings dui op ’n groter kans op reën in die tweede week van Desember oor die sentrale tot oostelike dele. “Toestande bly egter ongunstig oor die westelike dele van Suid-Afrika.”