HIÉR KOM SIEKTE VOOR
DIE departement van landbou, grondhervorming en landelike ontwikkeling het in sy jongste verslag oor die uitbreking van bek-en-klouseer bevestig dat die voorkoms van die siekte op tien persele geïdentifiseer is.
Dit sluit kommersiële veeplase, ’n kommunale plaas, voerkrale en abattoirs in.
Ál die persele is in Limpopo geleë met geen ander provinsies wat tot dusver geraak is nie.
Van die persele is geïdentifiseer nadat kliniese tekens by vee voorgekom het, terwyl die meeste geidentifiseer is ná goeie opvolg- en nasporingswerk. Hulle is met die verspreiding van die siekte verbind deur veilingverkope of deur beweging vanaf besmette plase.
Verskeie kliniese tekens kom op die verskillende persele voor. By sommige persele het die vee slegs klousere en by ander die bekende beksere, aldus ’n verklaring van die departement.
KWARANTYN
Al die persele is onder kwarantyn geplaas en diere met gesplete kloue mag nie van die persele beweeg nie. Streng biosekerheidsmaatreëls is ingestel om die verspreiding van die siekte te keer.
Kliniese ondersoeke van al die diere met gesplete kloue op al die betrokke eiendomme word uitgevoer. Geen nood-entstowwe word toegedien nie.
Die departement sê die virus wat vir die jongste uitbreking verantwoordelik is, is ’n SAT 2-serotipe, wat naby verwant is aan die virus wat verantwoordelik was vir die uitbreking in Januarie vanjaar. Dit is ook verwant aan uitbrekings in die bek-en-klouseergebied in Mei en Augustus 2018.
Die presiese oorsprong van die uitbreking is nog nie bepaal nie, maar die vermoede bestaan dat die onwettige beweging van diere met gesplete kloue vanuit die bek-en-klouseerbeheergebied die virus na die bek-en-klouseervrye gebiede geneem het.
HANDELSIMPLIKASIES
Nadat Suid-Afrika sy status as vry van bek-en-klouseer in Januarie verloor het, is ooreenkomste met handelsvennote aangegaan vir die uitvoer van veilige produkte, wat hittebehandelde vleis en suiwelprodukte, ontbeende en verouderde rooivleis, wol, gesoute huide en velle en vee-embrio’s insluit.
Die meeste van Suid-Afrika se handelsvennote het tot dusver die onderhandelde ooreenkomste behou op grond van waarborge vir die verwerking van produkte.
Suid-Afrika is ook vol vertroue dat hy die veiligheid van sy varkvleisprodukte vanaf bek-en-klouseervrye kompartemente sal kan sertifiseer.