FINANSIERING VIR SKADUNETTE
NEDBANK het pas ’n innoverende finansieringsplan bekend gestel om boere te help met die oprigting van skadunette in hul boorde sodat hulle onder meer groter beskerming teen wind, hael, ryp, sonbrand en voëls kan geniet.
Mnr. Maluta Netshaulu, senior bestuurder vir die landbou by Nedbank, sê die nette verbeter die doeltreffendheid van waterbenutting met 25% en is ’n bedryfsoplossing wat in ooreenstemming met die Verenigde Nasies se doelwitte vir volhoubare ontwikkeling is.
“Suid-Afrika se voortslepende droogtetoestande vereis dringende optrede om die toenemende gevolge van klimaatsverandering, veral in die landbousektor, te verminder.”
Die gebruik van skadunet verminder ook die toediening van stikstof, bied besparings op boordsanitasie, bevorder die groei van jong bome sodat hulle vinniger volwassenheid bereik en verbeter vruggrootte en -kleur.
Netshaulu sê skadunet is duur met ’n geraamde koste van minstens R240 000 per hektaar vir ’n permanente struktuur.
“Ons glo egter dat die voordele die koste regverdig. Ons finansieringsplan, wat oor vyf jaar strek, sal boere in staat stel om skadunette te span sonder dat hul kontantvloei onder druk geplaas word. Ons bied die finansiering aan bestaande én nuwe kliënte sonder dat hulle sekuriteit hoef te bied. Die voorwaarde is egter dat hulle die bank vir ál hul finansiële behoeftes gebruik.”
Die termyn van die finansiering is tot 60 maande. Die terugbetalingsbepalings is in ooreenstemming met die boer se kontantvloeiposisie en oestyd. ’n Deposito van 20% word vereis om arbeidskoste te dek, maar geen tasbare kollateraal word vereis vir die lening nie. Die kliënt se finansiële posisie ten opsigte van normale kredietbeginsels word wel in ag geneem.
Die bank hoop om veral uitvoerboere van onder meer sitrus, neute, wyn, druiwe, rosyne en bessies by die plan te betrek.
Netshaulu sê die plan is begin November bekend gestel en daar is reeds groot belangstelling onder bestaande kliënte.
“Ons verwag ’n toename in aansoeke volgende jaar namate boere daarvan hoor en besef wat dit vir hul produksie kan beteken.”