NGUNITELERS TROEF VERBOD MET KATALOGUSVEILING
DIE uitbreking van bek-en-klouseer in Limpopo, wat op 6 November deur die departement van landbou aangekondig is, en die daaropvolgende verbod op lewendehaweveilings, het die Nguni-beestelersgenootskap gedwing om vinnig planne te beraam rakende veilings.
Die departement het op 14 November in ’n verklaring aangekondig dat lewendehaweveilings in Limpopo, Mpumalanga, Gauteng en Noordwes verbied is. Die genootskap se nasionale stoetveiling, die noordelike Nguniklub se stoetveiling en die genootskap se veiling van kommersiële Nguni’s moes op 23 November tydens die genootskap se jaarvergadering by Klein-Kariba naby Bela-Bela plaasvind.
Dr. Oswald Jannasch, voorsitter van die genootskap, sê hulle moes vinnig moeilike besluite neem om steeds met die veilings te kon voortgaan. “Ons het besluit om die kans te waag en ’n interaktiewe katalogusveiling aan te bied. Dit is in minder as ’n week gereël. Ons bemarkingsagente, GWK en Nuthouse Marketing, het dag en nag gewerk om dit moontlik te maak.”
Hy sê weens die invloed van bek-en-klouseer het hulle besluit om nie die veiling van kommersiële diere aan te bied nie.
“Die ander twee veilings is wel aangebied. Ondanks die min tyd tot ons beskikking het ons slegs enkele haakplekke gehad.”
Dr. Pierre Bester, ’n veearts van Bela-Bela, het aan die begin van die veiling die onderskeie regulasies wat vir dié veilings en vir die vervoer van die diere geld, aan alle kopers en verkopers verduidelik.
BEGIN NUUT DINK
Jannasch sê die veilingsbedryf sal weens die probleme beslis “nuut moet dink en sy deel moet doen vir biosekerheid”. Hy kan nie vir die staat wag nie, anders gaan hy nie meer sake doen nie. “As jy nie eens vir die Comrades aantree nie, sal jy beslis nie klaarmaak nie.”
Hy sê hoewel goeie pryse vir van die diere behaal is, kon pryse beter gewees het.
“Die hoeveelheid diere wat verkoop is, en die pryse is beslis deur die uitbreking van bek-en-klouseer beïnvloed, maar veral deur die onsekerheid vanweë ’n tekort aan sinvolle inligting van die regering se kant af. Die afwesigheid van die diere het in ’n mindere mate ’n invloed gehad.”
Van die beste pryse wat op die nasionale Nguni-stoetveiling behaal is, is dié van die bul NH 16 24 Dingaan, wat vir R100 000 verkoop is.
Pryse vir dragtige koeie en dragtige verse het gewissel van R20 000 tot R12 000.
Op die noordelike Nguniklub se stoetveiling het pryse gewissel van R20 000 vir ’n bul tot R8 500 vir verse.
VOORDELE
Jannasch sê die voordele van dié tipe veiling in hierdie onseker tye moenie onderskat word nie. Die voordele sluit in:
■ Die handhawing van biosekerheid.
■ Die beperking van die stresfaktor van die diere, met diere wat veral spanning ervaar as hulle baie ver vervoer moet word.
■ Die besparingsfaktor vir die verkoper, koper én die afslaer.
■ Dié tipe veiling bring die koper en verkoper weer nader aan mekaar.