Vennootskap se sukses gevier
“DIT gaan oor voedselsekerheid, nie politiek nie,” het mnr. Charles Davis aan die werknemers van Amadlelo Agri op die maatskappy se jaarlikse prysuitdelingsgeleentheid gesê.
“Julle is die mense wat die moed gehad het om die kwessies van die land aan te pak,” het Davis, een van die kommersiële boere en aandeelhouers in die maatskappy, gesê.
Erkenning is op dié geleentheid gegee aan die vaardighede van die werknemers van Amadlelo Agri se vyf melkplase in die voormalige tuislande. Eerbewyse is onder meer oorhandig vir die hoogste wins per hektaar, die minste kunsmis gebruik, die beste meganiese afdeling en die beste KI-praktyke.
Die prys vir die winsgewendste melkplaas is aan die Fort Hare Dairy Trust by Alice in die Oos-Kaap oorhandig. Me. Sanele Vele is die hoofbestuurder.
Dit is vanjaar die vyfde keer dat eerbewyse oorhandig is aan nuwe toetreders tot die landbou wat by kommersiële boerdery betrokke is.
Amadlelo Agri is in 2002 gestig. Dit word in vennootskap besit deur swart entrepreneurs, kommersiële boere, ’n swartbeleggingsmaatskappy en die werkers, deur die Amadlelobemagtigingstrust.
Davis het gesê Suid-Afrika is ’n jong land met baie probleme. Met dié pryse word die werkers se prestasies gevier.
In die vyf boerderye word altesaam 6 000 koeie gemelk wat jaarliks 30 miljoen liter melk lewer. Daardeur word R30 miljoen per jaar in die ekonomie van die plaaslike gemeenskappe teruggeplaas. “Waar anders gebeur dit?”
Amadlelo Dairy lewer ongeveer 20% van die melk van Coega Dairy, Suid-Afrika se sesde grootste melkverwerker. Dié melk word onder meer gelewer aan die Famous Brands-kaasmaatskappy, ’n gesamentlike onderneming van Coega Dairy en Famous Brands.
Mnr. Lewellyn Collet, ’n nie-uitvoerende direkteur van Coega Dairy, het gesê danksy dié vennootskap word die melk landwyd verkoop.
Davis het gesê Amadlelo beweeg steeds vorentoe. Danksy die vaardighede wat oorgedra word, kan die boerderye se bestuurders met enigeen meeding.
Een van die bestuurders, mnr. Leonard Mavhungu, is in 2018 deur Landbouskrywers SA as Nuwe Toetreder tot Kommersiële Landbou aangewys.
Mnr. Jeff Every, die maatskappy se stigter, is vereer vir sy bydrae om opkomende melkboere in die voormalige tuislande te bemagtig.