DROOGTE IS ‘NASIONALE KLIMAATRAMP’, SÊ MEYER
“HIERDIE is nie net ’n droogte nie, dit is ’n nasionale klimaatramp,” het dr. Ivan Meyer, Wes-Kaapse minister van landbou, tydens ’n gesprek met die georganiseerde landbou, landboubesighede en finansiële instellings gesê.
Die gesprek is deur Agri Wes-Kaap belê om te bespreek hoe die risiko’s en gevolge van die voortslepende droogte in die provinsie bestuur kan word. Meyer het gesê ’n langtermynplan is nodig om die landboubedryf in die provinsie volhoubaar te maak.
Mnr. Jannie Strydom, uitvoerende hoof van Agri Wes-Kaap, het gesê in die droogte is dit noodsaaklik dat alle belanghebbendes saamwerk om die ekonomiese werklikhede van die droogte vir produsente te bestuur, veral omdat sommige produsente nie vir droogtehulp in aanmerking kom nie en verskeie plaasgemeenskappe humanitêre hulp nodig het.
“Ons sal anders oor rampe soos droogtes moet begin dink om die ongunstige domino-uitwerking daarvan proaktief te bestuur. Die bydrae van die landbou tot die Wes-Kaap se ekonomie is te belangrik om nié ’n volhoubare sektor te hê nie. ’n Gesamentlike bestuurstrategie is noodsaaklik.”
LANGTERMYNSTUDIE
Meyer het gesê die belanghebbendes wat teenwoordig is, verstaan die impak en risiko’s wat die droogte vir produsente meebring. Hulle is daartoe verbind om die hele droogteproses omsigtig te hanteer.
Meyer het onderneem om geld te bewillig vir ’n langtermynstudie oor die invloed van klimaatsverandering op die landbou in die Wes-Kaap.
“Die departement van landbou in die Wes-Kaap was nog altyd ’n lojale vennoot van Agri Wes-Kaap en ons waardeer dit dat dr. Meyer, nes sy voorganger, die georganiseerde landbou in die provinsie ondersteun,” het Strydom gesê.
Agri Wes-Kaap het onlangs R10 000 aan die VLV Wellington se Boks vir ’n Boervrou-projek geskenk om met die verspreidingskoste te help. Dié skenking kom uit Agri WesKaap se droogtehulpfonds.
Volgens Strydom stap Agri Wes-Kaap al vyf jaar lank die droogtepad saam met produsente, en weet hoe moeilik dit vir die vroue op plase is om sterk te bly in swaarkrytye.