HOMMELTUIG-MARK KEN GEEN PERKE
Die globale mark vir die gebruik van hommeltuie in die landbousektor kan teen 2025 reeds $5,19 miljard (sowat R76,5 miljard) sterk wees en oor die volgende ses jaar teen ’n saamgestelde jaarlikse groeikoers van 31,1% groei.
Dit is luidens ’n markverslag, Agriculture Drone Market: Global Opportunity Analysis and Industry Forecast (2019-2025), wat in November deur Meticulous Research uitgereik is.
Die groei in die gebruik van die hommeltuie in die landbousektor word toegeskryf aan die ál groter druk wat boere wêreldwyd ervaar om genoeg kos vir ’n groeiende bevolking te verskaf. Die feit dat beleggers bereid is om die ontwikkeling van die nodige tegnologie daaragter te finansier, is ’n bron van steun vir die bedryf.
Daarby is die gebruik van inligting- en kommunikasietegnologie binne die landbou besig om wesenlik te groei. Outomatisering, ’n al groter klem op doeltreffende boerderypraktyke en die behoefte om water spaarsamig te gebruik, is ook faktore wat sorg dat hommeltuie toenemend deel word van boere se bestuursplanne.
Tans geniet die hardewaresektor van die bedryf die grootste groei, namate mense modelle aankoop en ou modelle begin vervang met doeltreffender, verbeterde ontwerpe.
Die verslag verwag dat gepaste sagteware-ontwikkeling in die volgende paar jaar die toon sal aangee, veral as dit kom by produkte wat die nodige data-ontleding kan doen.
Hommeltuie word tans hoofsaaklik as hulpmiddels in presisieboerdery gebruik. Die samestellers van die verslag voorsien dat dié onbemande tuigies teen 2025 toenemend ingespan gaan word vir besproeiingsdoeleindes sodat watergebruik beter bestuur kan word, ook tydens droogtes.
Tans gee Noord-Amerika (en veral Amerika) die toon aan as dit by die gebruik van hommeltuie kom, gevolg deur Europa en die Asië-Pasifiese streek. Die toenemende gebruik daarvan in Noord-Amerika word toegeskryf aan verbruikers se behoefte aan hoëgehalteprodukte, die stygende koste van arbeid en die toenemende outomatisering van die landbousektor. Daarby is regulasies oor die gebruik van klein hommeltuie vir landboudoeleindes ook gunstig.
Die grootste groei word vir die Asië-Pasifiese streek voorspel, onder meer vanweë bevolkingsgroei en ekonomiese vooruitgang, wat meer voedsel nodig maak.