Waterlisensies: Proses gaan versnel word
ME. LINDIWE SISULU, minister van menslike nedersettings, water en sanitasie, het haar daartoe verbind om waterlisensie-aansoeke vinniger af te handel.
“Die omkeertyd is nou 49 dae, mits alle dokumente ingedien is en onderhewig daaraan dat alle ander prosesse gevolg is,” het sy met die bekendstelling van die departement se nasionale water-en-sanitasiemeesterplan in Pretoria gesê.
Mnr. Theo Boshoff, hoof van regsintelligensie by die landbousakekamer Agbiz, het in reaksie aan Landbouweekblad gesê die 49 dae hou verband met een deel van die aansoekproses.
Die betrokke regulasie vereis steeds afhandeling binne 300 dae, wat in verskillende dele verdeel is, elk met sy eie tydvereiste.
“Die (minister se) verbintenis strook met verbintenisse wat deur die nasionale ekonomiese, ontwikkelings- en arbeidsraad (Nedlac) se werkberaadproses gemaak is.
“Daar is reeds ’n beduidende verbetering, waarvoor die departement sekerlik krediet verdien.”
Sisulu het gesê die vinniger afhandeling volg nadat pres. Cyril Ramaphosa vroeër aan die kabinet gesê het dit het hom drie jaar gekos om ’n waterlisensie te kry. “As dit ons drie jaar kos om ’n waterlisensie uit te reik, hoe gaan ons beleggers lok (en oortuig) om te glo dat ons ernstig is daaroor om die ekonomie om te keer?”
Volgens haar is etiese leierskap die noodsaaklikste deel van die uitvoering van die meesterplan. Sy het onderneem dat die lank agterweë bestuursagentskappe vir opvangsgebiede voor die einde van die huidige administrasie tot stand gebring sal word.
TRANSFORMASIE
Sisulu het verwys na die mislukking in hertoewysing van water aan swart gebruikers die afgelope twintig jaar.
“Waar bestaande waterbronne reeds ten volle gebruik word, gee die Nasionale Waterwet die minister die magte om ’n verpligte lisensiëringsproses te onderneem vir die hertoewysing van watergebruikslisensies.”
Die departement en sy agentskappe sal na alternatiewe waterbronne vir swart kleinboere kyk, soos waar water nie benut word nie, waar meer water uit staatwaterskemas beskikbaar gestel kan word, die bou van klein damme of grondwaterontwikkeling, en die inwerkingstelling van gidsprojekte met vrywillige bydraes van boere vir die hertoewysing van water.
NUWE WET
Die meesterplan verwys na die lank verwagte wysiging van waterwetgewing, onder meer oor die beginsel van “gebruik dit of verloor dit” en die kwessie van tydelike of heeltydse verhandeling tussen gemagtigde watergebruikers.
Luidens die plan moet die wysigingswetsontwerp in 2021 in die Staatskoerant gepubliseer word, openbare raadpleging moet in 2022 volg en die wetsontwerp in 2023 hersien en afgekondig word.
Mnr. Jürgen Kögl, voorsitter van Sisulu se adviespaneel, het ná die tyd aan Landbouweekblad gesê veranderinge oor die oordraagbaarheid van waterregte sal nie sonder raadpleging met die landbousektor geskied nie.
Mnr. Janse Rabie, hoof van natuurlike hulpbronne by Agri SA, het die meesterplan verwelkom as ’n dokument wat ’n vertrekpunt vir gesprek bied, maar gesê die afhandeling van die verifikasieen bekragtigingsproses van bestaande, wettige watergebruikers behoort ’n integrale deel van die plan te wees.
Die meesterplan kan by
https://tinyurl.com/rl4s5lc gelees word. — CARIEN KRUGER