Spoedrekord: Trekker haal 217 km/h
‘Ons is onlangs ingelig oor goed georganiseerde misdadigers wat tenks vol brandstof uit brandstofpyplyne tussen Gauteng, die Vrystaat en Mpumalanga steel.’
DIE feestyd wat binnekort aanbreek, is vir die meeste Suid-Afrikaners ’n tyd van rus. Misdadigers neem egter nie ’n blaaskans nie. Daarom word boere en landelike gemeenskappe gemaan om in dié tyd meer paraat teen misdaad te wees.
Georganiseerde landbou-organisasies waarsku boere nie net teen moontlike aanvalle op plase nie, maar ook teen die diefstal van vee, landboumasjinerie, saad en diesel. Diefstal van saad en kunsmis neem in dié tyd toe, veral omdat dit planttyd op baie plase is.
Boere word aangeraai om nie trekkers en werktuie met diesel en saad oornag op landerye te los nie, of om hulle voldoende te beveilig sodat hulle nie leeggesteel of self gesteel word nie.
“Boere moet hul dieseltenks en -punte goed beheer en nagaan,” sê mnr. Tommie Esterhuyse, voorsitter van Agri SA se veiligheidskomitee.
“Ons is onlangs ingelig oor goed georganiseerde misdadigers wat tenks vol brandstof uit brandstofpyplyne tussen Gauteng, die Vrystaat en Mpumalanga steel. Die polisie versoek plaaswagte om verdagte voertuie, vragmotors of tenkers wat hulle in landelike gebiede naby aan pyplyne sien – veral in die nag – aan te meld.”
KOMMUNIKASIE
Mnr. Henry Geldenhuys, voorsitter van TLU SA se veiligheidskomitee, sê dit is uiters belangrik dat boere en landelike bewoners toesien dat hulle inskakel by ’n plaaslike veiligheidstruktuur of plaaswag.
“Maak seker dat jy ’n stelsel besit, soos drierigtingradio’s, waarmee jy kan kommunikeer as daar beurtkrag of ’n kragonderbreking is wat selfoontorings en gevolglik die selfoonsein kan beïnvloed.”
As vreemde geluide buite die huis gehoor word, is dit belangrik dat die plaaswag of sekuriteitsmaatskappy ontbied word pleks daarvan om self ondersoek te probeer instel.
Die verbod op veilings weens die uitbreking van bek-en-klouseer kan daartoe lei dat sommige boere vee op die plaas verkoop om steeds ’n inkomste te kan genereer.
“Wees uiters versigtig daarmee. Maak baie seker van die mense wat jy vir sulke transaksies op jou plaas toelaat en moet nie kontant op die plaas hou nie.”
Geldenhuys sê boere moet hul wapens by hulle dra en seker maak dat hulle weet hoe hul wapens werk.
“Boere wat self dalk weggaan vir die feestyd moet sorg dat hulle nie wapens in die huis hou nie, want misdadigers breek dikwels by plaashuise in om wapens te steel.”
Volgens Esterhuyse moet boere toesien dat hul veiligheidstelsels in ’n goeie werkende toestand is. Hulle moet streng toegangsbeheer toepas ten opsigte van die mense wat by hulle, by werkers of by bewoners op plase kom kuier sodat hulle bewus kan wees van vreemde mense wat in die omgewing beweeg.
VEEDIEFSTAL
’n Toename in veediefstal word verwag. Hoewel veediefstal in die algemeen vanjaar toegeneem het, neem dié misdaad tradisioneel toe van middel Desember tot middel Januarie, sê mnr. Willie Clack, voorsitter van die nasionale veediefstalvoorkomingsvereniging.
“Veediewe weet baie goed wanneer daar meer geld beskikbaar is om vleis te kan koop en daar dus ’n hoër vraag bestaan.”
Clack, Esterhuyse en Geldenhuys versoek boere om te midde van die planttyd en die feestyd seker te maak dat hulle gereeld hul vee tel.
Geldenhuys moedig boere aan om vee in kampe naby grootpaaie eerder te verskuif.