Wynplaas in Klein-Karoo wil miljoen spekbome plant
BOPLAAS, ’n wynplaas in die Klein-Karoo wat veral bekend is om sy pryswenner-portstylwyne, beoog om 1 miljoen spekbome teen 2025 te plant.
Volgens me. Rozanne Nel, bemarkingsbestuurder van Boplaas digby Calitzdorp, word die spekboom beskou as ’n “wonderwerkerplant” wat baie doeltreffend is om koolstofdioksied in suurstof om te skakel. Dit kan dus help om klimaatsverandering teen te werk.
“Dit het vyf jaar laas ordentlik hier gereën. Ons moet al hoe meer druiwe uit die omgewing aankoop omdat die produksie op die plaas afgeneem het. Ons moes dus die sakemodel aanpas en meer op spiritualieë begin konsentreer,” sê sy oor die veranderende klimaat.
“Die wêreld is by breekpunt en ons moet alles in ons vermoë doen om ’n internasionale klimaatskatastrofe te vermy. Die spekboom (Portulacaria afra) is inheems aan die Klein-Karoo en verrig wonderwerke wat koolstof betref. Die spekboom is die doeltreffendste koolstofneerlegger ter wêreld (vir die hoeveelheid water wat dit gebruik).”
’n Enkele spekboom kan tonne koolstof in die grond neerlê. Navorsing toon die wêreld produseer tans 1 331 ton koolstofdioksied per sekonde.
Rozanne se pa, mnr. Carel Nel, was nog altyd passievol oor natuurbewaring en het sowat 20 jaar gelede ’n stuk grond van 2 200 ha gekoop wat hy gerehabiliteer en bewaar het.
Hoewel spekbome natuurlik in die gebied voorkom, gaan die Nels nóg 1 miljoen spekbome oor die volgende vyf jaar vestig. “Dit is my pa se manier om terug te gee aan die natuur. Ek was nog klein toe hy al gesê het ons gaan nog eendag betaal word om bome te plant.”
Die familie gaan ook spekboomsteggies gratis van die plaas en proelokaal in Klein-Brakrivier aan mense gee.
“Hulle kan net kom aanklop daarvoor. As ons duisend mense sover kan kry om elk honderd spekbome te plant, beteken dit 100 000 spekbome wat klimaatsverandering help beveg.”
Sy hoop mense gaan die steggies in hul tuine, op landgoedere of op plase plant.
“Die spekboom pas uitstekend by sy omgewing aan en kan omtrent enige plek floreer. Dit maak wonderlike heinings en pragtige struike. Dit kan in die veld, blombeddings of potte geplant word.”
Die Nels sal ook inligting verskaf oor hoe om steggies te maak en dit te plant. “Die spekboom verg baie min onderhoud en kan met die minimum hoeveelheid water oorleef.”