AALMOESE EN SKENKINGS NIE DIE ANTWOORD
Die inspirerende hoof van Die Kooperasie se maatskaplike ontwikkelingsprojekte is toegewy daaraan om te bou op dit wat mense besit, en hamer nie op dit wat hulle nie het nie.
Onder leiding van mnr. Willie Oosthuizen, hoof van Die Kooperasie-gemeenskapstrust wat in 2018 gestig is, word ’n uiteenlopende arsenaal projekte aangepak. “Aalmoese en skenkings is nie die antwoord vir armoede nie. Bemagtiging en volhoubare ontwikkeling is.
“Die gemeenskap kry te make met geleenthede vir groei, en dit kan tot broodnodige verandering lei.”
Die trust het vier ontwikkelingsgebiede waardeur hy dié veranderinge wil meebring. Dit sluit maatskaplik-ekonomiese groei, opleiding en onderrig, sorg vir bejaardes en gesondheidsbevordering in.
Sy benadering is om op die bates van ’n gemeenskap te konsentreer pleks van op die behoeftes van die gemeenskap. “Só kweek jy ’n gunstige ingesteldheid en kan gemeenskappe help om hul eie ontwikkeling te grond op dit wat hulle reeds het.”
Binne net ’n jaar het die trust 20 projekte onder sy vaandel, met 4 600 begunstigdes en 13 275 mense wat daardeur geraak word.
Altesaam 135 heeltydse poste is geskep, en 325 vrywilligers is betrokke.
Die Josua-projek sien om na kwesbare en straatkinders in Jeffreysbaai se strate. Danksy dié projek kry hierdie kinders die nodige ondersteuning, opvoeding en vaardigheidsontwikkeling en mentorskap.
Die Healthy Mom and Baby Clinic bied ondersteuning, mediese sorg en opvoeding aan jong ma’s om hul babas met die regte kennis en ondervinding groot te maak.
Die Compass GF4GF-sentrum het vanjaar sy deure op Somerset-Oos geopen. Dit is ’n klein, veeldoelige plaas waar jeugdiges ná skool ’n oorbruggingsjaar voltooi en landbou- en lewensvaardighede aanleer.