ONONDERBROKE KRAG LAAT PLUKSEISOEN GLAD VERLOOP
DIE plaaslike vrugtebedryf is dankbaar dat hy tot dusver in die pluk- en pakseisoen ononderbroke kragvoorsiening gehad het.
Mnr. Francois Malan, besturende direkteur van Ceres Fruit Growers (CFG), sê die vrugtebedryf se besigste plukseisoen duur van Februarie tot Mei. Ná die vrugte gepluk is, moet dit so gou moontlik verpak en verkoel word. Dié proses vereis ononderbroke krag.
Malan sê CFG is dankbaar dat die regering die vrugtebedryf as ’n noodsaaklike diens verklaar het. “Ons hoop dié akkurate beskrywing van die bedryf sal in die komende maande erken word wanneer beurtkrag weer
’n moontlikheid word. Die krag in die mynbedryf word selde afgesny. Ons hoop dieselfde sal vir die vrugtebedryf gedoen word.”
Die vrugtebedryf in die Wes-Kaap het ten spyte van talle struikelblokke weens die Covid-19-pandemie ’n suksesvolle oes gehad. Tru-Cape-vrugtebemarkers, waarvan CFG en Two-a-Day aandeelhouers is, is “versigtig optimisties” oor die oes se resultate.
TOENAME
Tru-Cape se produsente lewer jaarliks sowat 1 811 539 405 vrugte met ’n gemiddelde gewig van 117 g elk. Dit is meer as 211 000 ton, wat gelykstaande is aan die gewig van 46 067 olifante.
Mnr. Roelf Pienaar, besturende direkteur van Tru-Cape, sê hoewel Tru-Cape vrugte na meer as 104 lande uitvoer, bly die plaaslike mark vir hom uiters belangrik.
“Bykans die helfte van ons totale verkope is in Afrika. Ons is baie trots daarop.”
Tru-Cape verwag dat sy produksie in die volgende drie tot vyf jaar tot 237 500 ton sal toeneem.