Trekkerstories: Die ‘gedenkwaardige’ demonstrasie
en trekkerbestuurder Kiewiet skommel heen en weer dat dit lyk asof hy op ’n perd ry. Die baler begin die gesnyde lusern opvreet en die eerste bale maak hul verskyning op die agterste geut. Die voornemende kopers en gewoon nuuskieriges volg die baler. Gaan die eerste baal val en heel bly? Dit gebeur inderdaad. Die bale word bekyk, betas en beruik en die nuuskieriges hardloop hoogs in hul skik verder agter die rooi wonderwerk aan.
En toe gebeur dit – die voorste wiel van die baler breek morsaf!
Die trekstang sak gevaarlik en nou beweeg die krukstang nie meer vry nie. Elke keer wat dit die grond raak, spring die baler die lug in. Bloubottel agterna. Pandemonium!
Die hoofkarakters en grootoog-besoekers spring uit die pad van die bokspringende gevaarte en, gewoond daaraan om diere op ’n hoop te jaag, probeer hulle armswaaiend die trekker en baler tot bedaring skreeu. Kiewiet het sy pos verlaat en sluit hom hoed in die hand by die ander aan.
DIE OPLOSSING
Hoofkarakters hou vinnig kajuitraad en besluit die enigste oplossing sal wees om die baler se enjin af te skakel, maar hoe? Niemand sien kans om sy lewe tussen ’n paar ton draaiende en springende staal te waag nie. Dus maar die vonkverdeler breek, en daarvoor word die omstanders opgekommandeer om klippe te bring. Klipgooiers was daar baie en die teiken op die balerenjin word met mening aangeval. Sonder sukses, want ’n bewegende teiken is nie ’n grap nie.
Terwyl die klipgooiery tevergeefs voortgaan, spring Willie in sy bakkie en verdwyn in ’n stofwolk. Ná ’n paar minute keer die stofwolk terug en Willie spring uit sy bakkie met sy dubbelloophaelgeweer. Die omstanders word uit die pad geboender en Willie lê aan. Vinger om albei snellers. Op en af, op en af, en BOEM! Met ’n laaste stuiptrekking kom die baler tot stilstand. ’n Stilte daal oor die skare. Die verloste Bloubottel luier bedees. Dan sê Willie: “Los hierdie verdomde ding. Kom ons gaan drink!”
Die partytjie wat gevolg het, was legendaries in die Sakrivier-kontrei. Só ook die McCormick Deering 50-AW-sleepbaler. Tussen die skroot op baie van die verlate plase sal jy vandag nog die geroeste oorblyfsels van baie balers as bewys daarvan kry rondlê.
Hennie Richter van Yzerfontein is redakteur van die gereelde nuusbrief van SAVTEK, die Suid-Afrikaanse Federasie van Veteraantrekker-en-enjinklubs.