BONSMARATELER SKOU MET AANTEKENINGE
’n Bonsmarateler het vanjaar as’t ware sy hele teelbeleid op Thabazimbi se skou vertoon. Hy meen so ’n vertoning is noodsaaklik voordat daar van die skou as die spieëlbeeld van die boerdery gepraat kan word.
Bonsmaras is op Thabazimbi vir die eerste keer in Transvaal op ’n tentoonstelling gesien. Sommer met die intrapslag het die vertoner, mnr. Gerhard Brönn van Matope, Ellisras, getoon dat sommige van die telers van hierdie beesras nie deur die “blinkheid” van hedendaagse skoue gelok word nie.
Hy het sy bulle en koeie saam met hul nageslag en prestasie-aantekeninge uitgestal, wat g’n vraag oor die vermoë van dié diere onbeantwoord gelaat het nie.
Brönn sê dat skoue “maar ’n taamlik verdraaide beeld” van werklike boerderye en selfs van die vertoners se teling weerspieël. ’n Dier met taamlik goeie bouvorm word gevoer totdat hy spekvet en glad verhaar is. Hy word “gepoeier” en “gepoleer” en dan vir beoordeling ingelei.
Of die bul in staat is om ’n nageslag te verwek en of die koei al ooit ’n kalf in die lewe kon bring, is vrae waarmee die publiek onbeantwoord huis toe gaan. Funksionele doeltreffendheid en die vermoë om te reproduseer — laat staan nog die resultaat van reproduksie — is onbekende faktore by dié diere.