Tuks-studente maak stewige bulletjies groot
TUKS se eerste voerkraalkompetisie het stewige bulletjies opgelewer. ’n Bonsmarabulletjie van 474 kg wat oorwegend deur vrouestudente grootgemaak is, was die grootkampioen op die eerste voerkraalkompetisie van die Universiteit van Pretoria se departement veekunde. ’n Boranbulletjie van 461 kg was die reserwegrootkampioen.
Die organiseerders kon beswaarlik ’n moeiliker jaar gekies het om só ’n kompetisie, wat in Februarie begin het, van stapel te stuur. Eers was daar die uitbreking van bek-en-klouseer wat die verskuiwing van diere verhinder het en wat die kompetisie kon knou, en daarna het die Covid-19-pandemie en die inperking ook ontwrigting gebring.
“Desnieteenstaande het die studente deurgaans hul kant gebring en uiteindelik diere van hoë gehalte gelewer,” sê prof. Eddie Webb, vise-dekaan van die fakulteit natuur- en landbouwetenskappe.
PRAKTIESE ERVARING
Me. Amelia du Preez, lektor by die Universiteit van Pretoria se departement veekunde en mede-organiseerder van die kompetisie, sê die doel van die kompetisie is om studente te leer om op ’n praktiese manier al die aspekte van ’n voerkraal te leer ken en te bestuur.
“Die vak Grootveekunde 420 leer hulle byvoorbeeld hoe om formulerings vir grootvee saam te stel en al die bestuur wat daarmee saamgaan, maar ons almal weet ook dat dit wat jy in die klas leer, prakties uitgevoer moet kan word. Vir ons studente is dit ’n groot geleentheid omdat hulle op hierdie manier nader beweeg aan die bedryf wat hulle gaan moet bedien.”
BEOORDELING
Die kompetisie het bestaan uit 119 beeste en 10 spanne studente. Elke span het 12 beeste gehad wat volgens die beginsels van ’n kommersiële voerkraal bestuur moes word. Deeglike aantekening van data is van die studente verwag, wat die verwerking van voerinnames en diere se gemiddelde daaglikse gewigstoename, asook voeromsettingsverhoudings ingesluit het.
“Hierdie, saam met algemene bestuurspraktyk, spansamewerking en die beoordeling van die lewende diere en die karkasse, sal die wenner van die kompetisie bepaal.”
Die kalwers sou ná die kompetisie by die Cavalier-groep se abattoir buite Cullinan geslag word, waarna die karkasse beoordeel is.
NADER AAN MEKAAR
Webb meen dié kompetisie is die ideale geleentheid vir die akademie en die veebedryf om nader aan mekaar te beweeg. “Die navorsing en projekte wat deur ’n instelling uitgevoer word, strook soms nie heeltemal met wat ’n bedryf verlang nie. Deur ’n kompetisie soos hierdie word die akademie en die veebedryf nader aan mekaar gebring en kan die bedryf regstreeks vir ons sê waar sy fokuspunte lê. Dit beteken dat ons deur ons navorsing werklike oplossings vir die bedryf kan skep wat voordeel vir die hele veewaardeketting inhou.”
Die beoordelaars was mnre. Johan Berg, senior beoordelaar en bestuurder van Obaro se landbouadvies-afdeling, Joseph Tanki Mokoena, voerkraalprojekbestuurder van Obaro, en Ampie de Jager, bestuursagent van Voermol.
Bykans 600 kykers het die beoordeling aanlyn gevolg. Boere wat kalwers aan die projek geskenk het, is genooi om te sien hoe hul diere presteer het.