FOOD FORWARD SA OORSKRY SY R50 MILJOEN-TEIKEN
NÁ hy homself vroeg einde Maart ten doel gestel het om R50 miljoen in te samel vir mense wat vanweë Covid-19 en die gevolge daarvan honger gelaat is, kon die welsynsgroep FoodFoward SA teen middel-Junie dié teiken met R3 miljoen oorskry.
Die organisasie sê in ’n verklaring hy kon danksy dié skenkings 3 100 ton kos, oftewel 12,4 miljoen maaltye, versprei. Hulle kan nou ook hul bedrywighede uitbrei na Limpopo, Mpumalanga en die Noord-Kaap.
Mnr. Andy du Plessis, FoodForward SA se besturende direkteur, sê die organisasie wil sy groeitrajek oor die komende twee jaar voortsit om nóg meer kwesbare landelike gemeenskappe by te staan. “Dit sal ’n bykomende R45 miljoen verg namate voedselonsekerheid verdiep. Die 24-maande trajek sal ons in staat stel om 750 000 meer mense daagliks te bereik deur ’n landwye netwerk van 1 500 begunstigde-organisasies. Die opgeskaalde steun is onontbeerlik indien ons die kwesbaarstes wil bereik.
REIKWYDTE
Die organisasie sê in ’n verklaring hy het sedert die begin van die inperking einde Maart sy netwerk van begunstigde-organisasies met 66% vergroot om daagliks 412 000 mense te bereik deur ’n netwerk van 1 005 begunstigde-organisasies. Hy neem binnekort ’n nuwe 14-ton vragmotor met ’n verkoelingsleepwa in ontvangs, waarmee hy toegang tot die surplusproduksie van 28 000 boere en meer as 1 000 boereverenigings kan kry danksy vennootskappe wat onlangs met Agri SA en die Sitruskwekersvereniging aangegaan is.
1 MILJOEN MAALTYE
Die kleinhandelgroep Food Lover’s Market het deur sy Hunger Month-veldtog geld vir 1 030 888 maaltye ingesamel. In dié veldtog kon klante ’n skenking maak deur in Mei spesifieke produkte van die veldtog se vennote te koop. Food Lover’s Market het dan R0,85 van die produk se prys gebruik om ’n maaltyd te verskaf aan iemand wat dit nodig het. Food Lover’s Market het ook 1% van sy totale omset op 28 Mei aan die veldtog geskenk.
Hunger Month is in 2017 vir die eerste keer aangebied. In die vier jaar wat die veldtog aangebied word, is genoeg geld vir 2 964 734 maaltye ingesamel.
Tru-Cape, ZZ2, Simpl Juice en Westfalia was vanjaar Food Lover’s se vennote in die veldtog.
Me. Kate Marais van Food Lover’s Market sê die veldtog is, danksy die vrygewigheid van hul klante en hierdie vennote, ’n groot sukses. “Dit is vir ons verblydend dat ander handelaars nou ook soortgelyke veldtogte begin het om maaltye vir behoeftige mense in te samel.”
Mnr. Roelf Pienaar, besturende direkteur van Tru-Cape, sê hoewel Tru-Cape die veldtog reeds ’n paar jaar ondersteun, was die behoefte aan kos vanjaar selfs groter vanweë die Covid-19-pandemie.
“Die mense van Tru-Cape is bly dat ons ’n bydrae kon lewer om kos op mense se tafels te sit. Ons bedank ons getroue klante wat Tru-Cape-produkte by Food Lover’s-winkels koop.”