Begrawe kommer oor besproeiing
’n Boer van Zimbabwe ly geen verliese weens afloopwater nie – danksy die gebruik van ondergrondse drupbesproeiing. Verdampingsverlies van die grondoppervlak word grootliks uitgeskakel. Kunsmisloging word ook beperk danksy dieper waterindringing.
Beter onkruidbestryding, minder skade deur insekte en knaagdiere, buigsame ontwerp en skedulering, en ’n langer gebruiksduur as bogrondse stelsels is van die voordele wat ondergrondse besproeiing bied.
“Ons gebruik sedert 2018 ondergrondse drupbesproeiing op ’n persentasie van ons suikeraanplantings en sien tot dusver goeie resultate,” sê mnr. Nick Botha, hoof van landboubedrywighede by Greenfuel in Zimbabwe.
“Ons kan steeds maklik verskeie take in die veld uitvoer tydens aktiewe besproeiing omdat die drupperlyne ondergronds geinstalleer is. Die arbeidsvereistes is ook laer.”
Ondergrondse drupbesproeiing is ’n gevestigde praktyk in SuidAfrika by gewasse soos suikerriet, pekanneute en lusern. Wêreldwyd word uitstekende resultate ook by mielies, sojabone en sonneblomme behaal.
Mnr. Michael Esmeraldo, landboukundige en streeksverkoopsbestuurder by Netafim SuidAfrika, sê boere moet ondergrondse drupbesproeiing oorweeg indien hulle so doeltreffend moontlik met water en kunsmis wil werk.
Een van die belangrikste voordele van drupbesproeiing, veral ondergrondse drupbesproeiing, is dat besproeiing dan toegankliker is. Esmeraldo verduidelik dat ondergrondse drupbesproeiing ingespan kan word in landerye of boorde van enige vorm en met enige topografie.
“Dit is die ideale oplossing vir terreine waar ander vorme van besproeiing, soos spilpunte of spuite, nie moontlik is nie.”
Die regstreekse toegang van die drupper tot die wortelsone maak ondergrondse drupbesproeiing selfs doeltreffender as bogrondse drupbesproeiing.
“Doeltreffende watergebruik is toenemend belangrik in moderne boerderye. Met ondergrondse drupbesproeiing kan beskikbare water doeltreffender aangewend word om produksie vol te hou met beperkte water, hoër produksie op dieselfde hektare te verseker of om meer hektare met dieselfde hoeveelheid beskikbare water te besproei.”
DIE REGTE STRATEGIE
Botha sê hulle het ’n duidelike verbetering in gewaseenvormigheid opgemerk sedert ondergrondse drupbesproeiing ingespan is. Dit kan toegeskryf word aan die meer eenvormige toediening van water en voedingstowwe.
“Plantgesondheid, plantestand en groeikragtigheid het ook baie verbeter,” sê Botha.
Verskeie besproeiingstrategieë word saam met ondergrondse drup aangewend, na gelang van die gewas, klimaatstoestande, grondsoort en ander faktore.
Dit wissel van aanvullende besproeiing om die grondwater
Seisoen inhoud in die ondergrond te herstel, tot daaglikse intensiewe besproeiing. Die strategie sal ook bepalend wees tot die toediening van kunsmis.
Esmeraldo sê voedingstowwe kan deur middel van die besproeiingstelsel toegedien word.
“Kunsmis kan in kleiner hoeveelhede en meer gereeld toegedien word. Die boer hoef nie alle kunsmis gelyk aan die begin van die seisoen toe te dien nie. Kunsmistoediening kan ook deur die loop van die seisoen aangepas word.”
Volgens Botha kan ondergrondse besproeiing ’n kostedoeltreffende alternatief tot permanente besproeiing met spuite of spilpuntbesproeiing wees.
“Die aanvanklike koste is wel hoog vergeleke met ander stelsels, maar die besparing en latere laer koste tel weer in die guns van ondergrondse drupbesproeiing. Ons bespaar 50% in algemene beleggingskoste.”
Hoewel ondergrondse drupbesproeiing minder krag gebruik as ander stelsels, moet die beskikbaarheid van krag in gedagte gehou word. Kragonderbrekings kan lei tot opbrengsverlies.
Daarom is dit sinvol om na sonkrag of ander alternatiewe kragbronne as rugsteun te kyk.
“Dit is ook belangrik om toerusting, die werking daarvan en watergehalte deurlopend dop te hou. Proaktiewe onderhoud is ’n vereiste, veral omdat dit moeilik is om probleme ondergronds op te spoor en te herstel. Kies filtrering versigtig en volg ’n streng onderhoudsprogram.”
Win die regte inligting in om ingeligte besluite te neem.
“Die fisiese grond en chemiese eienskappe is belangrik vir besluitneming en sal noodsaaklik wees om vas te stel of ondergrondse drupbesproeiing suksesvol toegepas kan word. Data van weerstasies en ander inligting oor die klimaatstoestande is ook belangrik om die waterbehoefte te bepaal,” sê Esmeraldo.
Kry die mening van saadmaatskappye of kwekerye om te verseker kultivars word geplant wat geskik is vir besproeiing en die potensiaal het vir die hoë opbrengs wat met drupbesproeiing gepaardgaan.
Esmeraldo waarsku dat afskeepwerk tydens die grondvoorbereiding, installering en skedulering tot ’n mislukte projek of teleurstellende resultate sal lei.
“Die sukses van die projek word grotendeels deur goeie grondvoorbereiding en sorgvuldige installering bepaal.
“Gee meer aandag aan skedulering as wat ander besproeiingsmetodes dalk vereis.
“Fyn en korrekte skedulering sal die beloofde besparing van water, energie en kunsmis verseker,” sê Esmeraldo.