BIOTA SE BYDRAE
Biota, oftewel Biodiversity Monitoring Transect Analysis in Africa, is tot stand gebring om onder meer volhoubare gebruik en bewaring van biodiversiteit in Afrika te bevorder.
Die projek het in 2001 begin as Biota Suider-Afrika, ’n gesamentlike projek tussen Suid-Afrika, Namibië en Duitsland. Die Duitse federale ministerie van opvoeding en navorsing het die meeste van die geld vir die tienjaarprojek verskaf.
Nadat die projek voltooi is, het die Sasscal-inisiatief (Southern African Science Service Centre for Climate Change and Adaptive Land Management) geld bygedra sodat die monitering kon voortgaan.
Dr. Ute Schmiedel, wat van die begin af betrokke was, sê Biota se belangrikste bydrae was die totstandkoming van biodiversiteitsobservatoriums wat die grondslag lê vir langtermynmonitering en versameling van data.
“Die data is noodsaaklik om die uitwerking van droogte op plantegroei vas te stel. Dit sal ons ook help om die langtermynneigings te verstaan.”
Die Biota-projek het ook menslike kapitaal help ontwikkel: van steun aan voor-, nagraadse en na-doktorale studente by tersiêre instellings, tot op voetsoolvlak waar plaaslike mense as para-ekoloë en tegnici in Suid-Afrika, Namibië en Duitsland ingespan is.