EDCON-SAKEREDDING SAL NIE KATOENBEDRYF POOTJIE NIE

DIE Edcon-groep se toewyding tot die plaaslike katoenbedryf sal beslis ’n leemte laat as die groep sy deure moet sluit.

Só sê mnr. Hennie Bruwer, uitvoerende hoof van Katoen SA.

Al sou die moontlike verlies van Edcon se bestelling nadelig wees vir die plaaslike katoenwaardeketting, is dit egter nie ’n nekslag vir plaaslike katoenprodusente nie.

“Tot 80% van Suid-Afrika se katoen word tans uitgevoer, terwyl 20% deur die plaaslike spinners verwerk word.”

’n Sakereddingsplan is einde Junie goedgekeur om Edcon van likwidasie te probeer red. Die inperking weens Covid-19 het Edcon se finansiële verknorsing vererger waarna hy om vrywillige sakeredding aansoek gedoen het.

Daar is groot waardering uit die katoenbedryf vir Edcon se betrokkenheid.

“Edcon se aanvanklike bestelling van 600 ton katoenlint in 2016 het oor die afgelope drie jaar gegroei tot 2 500 ton. Die maatskappy is ook toegewy daaraan dat sy hele katoenwaardeketting op geïdentifiseerde produkte, van die boer tot die winkelrak, 100% plaaslik bedryf word,” sê Bruwer.

ANDER VENNOTE

Benewens Edcon ondersteun twee ander kleinhandelgroepe ook die sambreelliggaam vir die plaaslike katoenbedryf, die Suid-Afrikaanse Katoenkluster (SACC) (voorheen die volhoubare katoengroep of SCC).

Ander kleinhandelaars wat nie deel van die SACC is nie, gebruik ook plaaslike katoen.

“Die regstreekse impak van een winkelgroep se sluiting is dus nie so groot dat dit die Suid-Afrikaanse boer omver gaan gooi nie.”

Die steun van plaaslike kleinhandelaars het baie daartoe bygedra om die afgelope aantal jaar nuwe lewe in die plaaslike katoenbedryf te plaas.

Volgens Bruwer was die samewerking tussen Katoen SA, verteenwoordigers van die katoenwaardeketting en die regering in 2013 om die SACC te stig ’n groot suksesfaktor wat meer sekerheid onder die boere geskep het om weer katoen te begin aanplant.

“Dit het die kapasiteit en mededingendheid in die Suid-Afrikaanse tekstiel- en klerenywerhede verhoog.”

Daar is toe R200 miljoen as deel van ’n vyfjaarplan belê om die bedryf lewensvatbaar te maak en plaaslike verbruik te stimuleer.

In 2014 was die Mr Price-groep die eerste kleinhandelaar wat met dié groep begin saamwerk het.

Later het die Edcon-groep en

Woolworths ook op produklyne wat met Suid-Afrikaanse katoen vervaardig is, begin konsentreer.

Bruwer sê die bedryf is bekommerd oor die impak van Covid-19 op sy voortgesette groei.

Sedert die stigting van die SACC het katoenproduksie in Suid-Afrika met meer as 800% gegroei en die private sektor het groot beleggings in die ontwikkeling van infrastruktuur gedoen.

Die struktuur wat die SACC ontwikkel het vir al die belanghebbendes in die waardeketting om saam om een tafel te sit, het bygedra tot vertroue en ’n deursigtige sakemodel wat die kopers nader aan die boer gebring het. Dit het die weg gebaan vir swart kleinboere en kommersiële boere om in groot getalle tot die mark toe te tree.

Hierdie groei op produksie- en pluismeulvlak het die behoefte vir nuwe groeigeleenthede geskep sodat plaaslike katoen op groter skaal plaaslik gespin en verder verwerk word.

“Die SACC het aansoek gedoen vir verdere finansiering van die regering – waarvoor daar nou al twee jaar gewag word. Met die nuwe veranderings aan die begroting weet ons nie of die geld gou beskikbaar sal raak nie.”

–