Pynappels gedy hiér
Die Oos-Kaap is een van die belangrikste pynappelgebiede in Suid-Afrika. Dís hoe die streek mededingend bly.
Pynappelpryse het in Junie verlangsaam nadat dit in die eerste week van Mei die hoogte ingeskiet het, waarskynlik vanweë die toelating van drankverkope sedert 1 Junie, berig Fresh Plaza.
Talle verbruikers het pynappels gekoop om tuisgemaakte bier te brou tydens die verbod op die verkoop van drank.
Pynappels het vroeg in Mei teen R18,54/kg op munisipale markte verhandel, maar die prys het sedertien tot R9,20/kg in Junie teruggesak. Sowat 80% van plaaslik verboude pynappels word jaarliks deur die verwerkingsmark opgeneem.
Die Oos-Kaap en Noord-KwaZulu-Natal (die distrik Hluhluwe) is Suid-Afrika se belangrikste produserende gebiede van pynappels. Meer as driekwart van Suid-Afrika se pynappels word in die Oos-Kaap geproduseer. Pynappels is inheems aan meer tropiese lande en dus aard die gewas in gebiede waar die klimaat warm, vogtig en vry is van uiterste temperature (25 °C is optimaal).
Mnr. Mark Harris van Bathurst in die Oos-Kaap, Suid-Afrika se grootste pynappelprodusent, sê die gladde Cayenne is die algemeenste pynappelkultivar wat daar verbou word. Dit word meestal vir verwerking gebruik.
“Hierdie kultivar is die beste geskik vir ons plaaslike toestande. Ons verbou pynappels verder suid as enige ander gebied ter wêreld en het dus ’n langer groeisiklus danksy ons koeler en droër toestande vergeleke met tropiese produksiegebiede. Normaalweg is die eerste oes tussen 24-30 maande en die tweede oes 18-20 maande later. Ons boerdery het in die 2019-’20-produksiejaar 15 700 ton pynappels verbou en ons verwag om vanjaar dieselfde te bereik,” sê Harris.
Die plaaslike mark neem slegs sowat 20% van Harris se pynappelproduksie. Die res word uitgevoer. Harris is nie bewus van enige spesifieke tarief- of statutêre belemmerings nie.
“Met slegs 6% van die wêreldmark moet ons egter nismarkte bekom om mededingend te bly, hoewel ons prysnemers is met hoër vragkoste vanweë geografiese ligging.”