Nuwe standaarde vir wolprodusente
Naspeurbaarheid, goeie praktyke en gehalte word al hoe belangriker vir produsente en verbruikers. Gevolglik het Cape Wools SA die Sustainable Cape Wool Standard van stapel gestuur as ’n hulpmiddel waarmee produsente kan verseker dat hulle aan al die nodige standaarde vir die bedryf voldoen.
Volhoubaarheid, biosekerheid en transformasie vorm die grondslag van al Cape Wools SA (CWSA) se aksies en projekte. Die raad het einde 2018 dié drie sleutelgebiede geïdentifiseer waarop die maatskappy voortaan toegespits sal wees.
Verbruikers het oor die afgelope vyf jaar ál meer aandag begin gee aan naspeurbaarheid en die praktyke van die waardeketting vir grondstowwe. Handelsmerke wil toenemend verseker wees dat die waardeketting deursigtig is en dat die five animal freedoms gehandhaaf word wanneer dierevesels ter sprake is.
Handelsmerke het dus ’n behoefte aan standaarde soos die ZQ Merino en Responsible Wool Standard. In tye waar die aanvraag groter is as die aanbod, kan die verskynsel van premies wat betaal word wel ter sprake kom, maar dit sal nie altyd die geval wees nie. Standaarde verseker dat die produk die beste moontlike blootstelling aan alle marksegmente kry en, in sommige gevalle, wel ’n mark het.
Suid-Afrikaanse wolprodusente het reeds groot welslae behaal om erken te word vir hul goeie produksiepraktyke en is tans die voorste voorsiener van wol aan van hierdie verwerkers.
Dit is egter noodsaaklik om hierop voort te bou en voortdurend goeie produksiepraktyke te verseker. Gevolglik het CWSA die Sustainable Cape Wool Standard van stapel gestuur. Dit is ’n kombinasie van die huidige standaarde en is gratis beskikbaar aan alle wolprodusente. Indien ’n produsent reeds deur ’n ander standaard geakkrediteer is, sal dit nie nodig wees om weer geassesseer te word nie. Alle sertifiserings word op ’n geïntegreerde naspeurbaarheidsplatform saamgevat sodat die koper en verwerker ingeligte aankope kan maak wat deur die mark aangevra word.
Die Nasionale Wolkwekersvereniging (NWKV) is gekontrakteer om die assesserings namens Cape Wools te behartig.
Dit sal per afspraak gebeur in al die produksie-eenhede van ’n produsent.
Assesserings word elektronies op ’n tablet gedoen, is papierloos en word ondersteun deur derdeparty-oudits van uitgesoekte produsente. Dit verleen verdere geloofwaardigheid aan die standaard.
Produsente kan hulself ook aanlyn evalueer om hulself aan die standaarde te meet en voor te berei vir die nodige vereistes. Hulle kan ’n assessering versoek by hul makelaar, die NWKV of aanlyn by
Skeerdienste is noodsaaklik in die volhoubaarheidsketting en dus het die wol- en sybokhaarbedryf ’n gesamentlike komitee gestig om riglyne vir skeerders te vestig wat al die belanghebbendes ondersteun. ’n Toepassing vir skeerders word tans gebou en dit sal deel vorm van die assesseringsproses volgens volhoubare produksieriglyne. Só word meer geloofwaardigheid verleen aan die proses en dien dit as ’n hulpmiddel vir produsente en skeerkontrakteurs.
TEKSTIELRESIDUE
Europa is die toonaangewendste vasteland wat verbruikerstandaarde en vereistes vir veilige produkte op winkelrakke betref.
Die International Wool Textile Organisation is betrokke by verskeie platforms en het verteenwoordiging op heelwat komitees om insette te maak rakende standaarde en hoe die verskillende vesels se reikwydte gemeet word van plaas tot fabriek.
Residue is een van die sake wat baie aandag geniet.
Dit word hoofsaaklik deur gifstowwe veroorsaak, maar ook APEO’s, oftewel alkielfenoletoksilaat, wat in wasmiddels en in beskermende bedekkings vir klere gebruik word.
Gifstoflimiete in tekstiele word deur die Okotex 100-standaard gereguleer, wat die gebruik van sekere gifstowwe problematies maak omdat dit selfs nie uitgewas word tydens die wasproses nie. Dit skep groot probleme vir die uitvoerders van wol en bokhaar na Europa omdat besendings eenvoudig afgekeur word sou sekere middels in toetse opgespoor word.
Die gebruik van gifstowwe wat sipermetrien, diasinoon of chloorfenvinfos bevat, word nie deur die Sustainable Cape Wool Standard toegelaat nie en alternatiewe middels word as ’n addendum in die riglyne ingesluit.
Die wol- en sybokhaarbedryf het reeds meer as twee jaar gelede