GELIEFDE SUID-KAAPSE JERSEYGEESDRIFTIGE STERF
MNR. MC TRUTER
bekende in suiwelkringe en veral gelief onder Jerseytelers in die SuidKaap, is onlangs op Stilbaai oorlede. Hy was 92 jaar oud.
Truter is in 1927 op Moorreesburg gebore waar hy skoolgegaan het tot st. 8, waarna hy matriek aan die Hoër Landbouskool Oakdale by Riversdal voltooi het.
Prof. Kobus Lazenby, sy skoonseun van die plaas Wilgenhof by Heidelberg (WesKaap), sê Truter het sy byna legendariese liefde vir die Jerseybeesras dáár ontwikkel. “Skoolseuns moes destyds self koeie melk. Oor naweke het seuns wat lui was vir die melkery, hom gehuur om in hul plek te gaan melk. Daar het sy liefde vir die melkbedryf en die Jerseyras gedy.”
In 1946 het Truter begin as ’n melkaantekenaar wat melkmonsters op plase moes neem. “Omdat koeikuddes toe maar klein was, kon hy topkoeie se stambome bestudeer.”
Later is hy as kuddebestuurder van Gledsmuir Jerseys van mnr. Harry Wood van Bredasdorp aangestel op aanbeveling van mnr. Dirkie Uys, die latere parlementslid. In 1954 het ’n groep stoettelers besluit om hul eie Melkaantekeningkoöperasie te stig en Truter die pos aan as amptelike melkaantekenaar aangebied. Ná bykans drie jaar in die pos, het Nestlé, die Robertsonkondensmelkfabriek, hom die pos as “suiwel landboukundige” – ’n eerste in SuidAfrika – aangebied, waar hy op 1 Julie 1957 begin het. Die opdrag was eenvoudig: Nestlé wou soveel moontlik puik melk bekom.
“Hy word allerweë erken as die mens wat die grootste bydrae gelewer het om die Jerseyras as een van die belangrikste beesrasse in die SuidKaap te vestig, asook om Jerseys op landbouskoue te bevorder. Op sy inisiatief is die SuidKaapse Jerseyklub gestig, waaruit die SuidKaap se prestigeJerseyveilings ontstaan het.
Hy was instrumenteel by die inskrywing van graadkuddes in die Jerseyhulpstamboek, onder andere van bekende telers, soos mnre. Nicky van Rensburg van Avondrood Jerseys en Gielie de Kock se SeaBreezestoetery, asook talle ander kuddes. Hy het langer as 70 jaar ’n noue pad met die Jerseyras gestap.
Dr. Carel Muller, suiwelkundige en voorheen verbonde aan die Landboukollege Elsenburg, onthou dat hy en Truter in die 1990’s koppe bymekaar gesit het “om seker te maak dat my boodskap aan boere nog reg was” – aldus Truter. “Hy was ook baie bekend as ‘Mnr. Nestlé’, en het geen geheim daarvan gemaak dat hy geglo het die Jerseyras dié beste beesras vir die SuidKaap is nie.”
Truter het op 30 Desember 2019 92 jaar oud geword, en is op 7 Junie vanjaar oorlede. Hy word oorleef deur sy tweede vrou, Mabel, asook twee dogters, mee. Lauche Fourie van Bettysbaai en Besmarie Ras van Worcester, uit sy eerste huwelik met wyle Emce. Daar is ook drie kleinseuns en een kleindogter, en ’n agterkleinkind.
Lazenby is besig om ’n bundel saam te stel van wat mense van Truter onthou, en vra dat mense bydraes aan hom stuur by